Library
Profile
କୃପା କର ବୀର
କୃପା କର ବୀର
ତ୍ରିପୁର ବିଜୟୀ ରାକ୍ଷସ ରାବଣ
କୋପେ ହୋଇ ଜରଜର
ଆଦେଶିଲା ଯାଅ ବୀର ଇନ୍ଦ୍ରଜିତ
ଭୀଷଣ କର ସମର ।
ଆଜ୍ଞା ପରମାଣେ ରଚିଲା ସେ ମାୟା
କଳ ବଳ କଉଶଳ
ନିକ୍ଷେପିଲା ଦୁଷ୍ଟ ଲକ୍ଷ୍ମଣ ବୀରଙ୍କୁ
ଶକ୍ତିଭେଦ ତୀକ୍ଷ୍ଣ ଶର ।
ଫେରିଲାନି ସଂଜ୍ଞା ମୂର୍ଚ୍ଛିତ ଲକ୍ଷ୍ମଣ
ବିଚଳିତ ହେଲେ ରାମ
ପରାମର୍ଶ ଦେଲେ ବନ୍ଧୁ ବିଭୀଷଣ
ଡାକନ୍ତୁ ବୈଦ୍ୟ ସୁଷେଣ ।
ଆଜ୍ଞା ନେଇ ଶିଘ୍ର ଲଙ୍କା କଟକକୁ
ଚଳିଗଲେ ହନୁମାନ
ଦେଖିଲେ ସୁଷେଣ ଆପଣା ପୁରରେ
ରହିଛନ୍ତି ବିଦ୍ୟମାନ ।
ନିବେଦନ କରି ଜଣାଇଲେ ତାଙ୍କୁ
ସମର କ୍ଷେତ୍ର ବୃତ୍ତାନ୍ତ
ଉପଚାର ଶିଘ୍ର ନହେଲେ ଲକ୍ଷ୍ମଣ
ହୋଇ ପାରିବେନି ସୁସ୍ଥ ।
ରାଜବୈଦ୍ୟ ବୋଲି ଯେହେତୁ ରାଜନ
କରିଛନ୍ତି ନିୟୋଜନ
ରାଜ ଆଜ୍ଞା ବିନା ନ ପାରିବେ ଯାଇ
ଉତ୍ତର ଦେଲେ ସୁଷେଣ ।
ସ
୍ମରି ରାମ ନାମ ବୀର ହନୁମାନ
ସଦନକୁ ବଳ କଷି
ଉତ୍ପାଟନ କରି ଘେନିଗଲେ ସଙ୍ଗେ
ସୁଷେଣ ବି ଥିଲେ ବସି ।
ଯେଣୁ ବୈଦ୍ୟରାଜ ଭଗବାନ ସମ
ଅଟନ୍ତି ଦିବ୍ୟ ସ୍ୱରୂପ
ରୋଗୀ ଉପଚାର କରିବା କର୍ତ୍ତବ୍ୟ
ନତୁବା ଅର୍ଜିବେ ପାପ ।
ସୁଜ୍ଞାନୀ ସୁଷେଣ ବଡ ବୁଦ୍ଧିମାନ
କଲେ ପରୀକ୍ଷା ନିରୀକ୍ଷା
କହିଲେ ଔଷଧି ମୃତ ସଞ୍ଜିବନୀ
ପ୍ରାଣ କରିପାରେ ରକ୍ଷା ।
ଆଗାମୀ କାଲିର ପ୍ରଭାତ ପୂର୍ବରୁ
ସୁଦୂର ହିମାଳୟରୁ
ଖୋଜି ଆଣି କିଏ ଦେଲେ ହିଁ ଲକ୍ଷ୍ମଣ
ବଞ୍ଚିବେ ମୃତ୍ୟୁ ମୁଖରୁ ।
ଚଳିଲେ ତୁରନ୍ତ ବୀର ହନୁମାନ
ନ କରି ହେଳେ ବିଳମ୍ବ
ଉତ୍ପାଟନ କରି ଆଣିଲେ ଔଷଧି
ପର୍ବତ ଗନ୍ଧମାର୍ଦ୍ଦନ ।
ସଦା ଉଜାଗର ଜୟ ହନୁମାନ
ପ୍ରଭୁ ଶ୍ରୀରାମଙ୍କ ଭକ୍ତ
କୃପା କର ବୀର ଅବୋଧ ଅଜ୍ଞାନ
ହେଉ ସ୍ୱକର୍ତ୍ତବ୍ୟନିଷ୍ଠ ।
