ପ୍ରଥମାଷ୍ଟମୀ
ପ୍ରଥମାଷ୍ଟମୀ
ମାର୍ଗଶିର ମାସ କୃଷ୍ଣପକ୍ଷ ତିଥି
ପ୍ରଥମ ଯେଉଁ ଅଷ୍ଟମୀ,
ଉତ୍କଳ ମାଟିରେ ପ୍ରତି ଘରେଘରେ
ପାଳନ୍ତି ପ୍ରଥମାଷ୍ଟମୀ l
ସବୁ ପରବରୁ ଏ ପରବ ଭିନ୍ନ
ନଥାନ୍ତି କୌଣସି ଦିଅଁ,
ସବୁ ପରିବାରେ ପୂଜା ପାଇଥାନ୍ତି
ଆମର ପୂଜ୍ୟ ପଢୁଅଁ l
ଏ ପରବ ପାଇଁ ମାମୁଁ ଘରୁ ଆସେ
ପିଠାପଣା ବସ୍ତ୍ର ଭାର,
ହଳଦୀ ପତରେ ଏଣ୍ଡୁରି ପିଷ୍ଟକ
ମହମହ ବାସ ତାର l
ଅତି ଶରଧାରେ ପୂଜନ୍ତି ପ୍ରେମରେ
ନୂତନ ବସ୍ତ୍ର ପିନ୍ଧାଇ,
ଧୂପଦୀପ ଦେଇ ଶୁଭ ମନାସନ୍ତି
ପ୍ରଭୁଙ୍କ ଆଶିଷ ନେଇ l
ଗ୍ରାମ ପରିବାରେ ଗଳି ବା ସହରେ
ସବୁଠି ଏହି ପରବ,
ପିଠାପଣା ମିଠା ସୁଅ ଛୁଟିଥାଏ
ଆହୁରି କେତେ ଦରବ l
ପଢୁଅଁ ସନ୍ତାନେ ଖୁସି ମାତାପିତା
ମିଳିବ ତାଙ୍କୁ ଆଶ୍ରୟ,
ଜଞ୍ଜାଳ ରୂପକ ଏହି ସମାଜରେ
ନଥିବ ତାହାଙ୍କୁ ଭୟ l
ପଢୁଅଁ ସନ୍ତାନ ମାତାପିତା ସମ
ବୋଲନ୍ତି ଜଗତ ଯାକ,
ଜ୍ୟେଷ୍ଟ ହେଲେ ଶ୍ରେଷ୍ଠ ସବୁରି ସ୍ଥାନରେ
ରହିବ ଆମରି ଟେକ l
ମାତାପିତା ଙ୍କର ଆଶ୍ରୟ ଅଟନ୍ତି
ପ୍ରଥମ ସନ୍ତାନ ଭାଇ,
ସମାଜରେ ହେଉ ଅବା ପରିବାରେ
ତେଣୁ ପୂଜା ଥାନ୍ତି ପାଇ l
ମାତାପିତା ପାଇଁ ଶ୍ରବଣ କୁମର
ସାନଙ୍କ ପାଇଁ ଶ୍ରୀରାମ,
ପାଆନ୍ତି ସମ୍ମାନ ଆମରି ପଢୁଅଁ
କରିଲେ ଉତ୍ତମ କର୍ମ l
ସବୁ ଜ୍ୟେଷ୍ଟ,ଶ୍ରେଷ୍ଠ ହୋଇଗଲେ ଆମ
ସମାଜ ଯିବ ବଦଳି,
ସାନ ଭାଇ ସାଥେ ବଡଭାଇ ଙ୍କର
କେବେହେଁ ନ ହେବ କଳି l
ପ୍ରଥମାଷ୍ଟମୀ ରେ ମିଳିମିଶି ସର୍ବେ
ଶପଥ ନେବାରେ ଭାଇ,
ଭାଇ ଭାଇ ମଧ୍ୟେ ବିଦ୍ବେଷ ଭାବକୁ
ସମାଜୁ ଦେବା ଦୁରେଇ l
ଯେଉଁ ପରିବାରେ ବଡଭାଇ ଦେଖ
ସାନ କୁ କରେ ଆଦର,
ସେହି ପରିବାରେ ପ୍ରଭୁଙ୍କ ଆଶିଷ
ଝରୁଥାଏ ନିରନ୍ତର l
ଆମ ଉତ୍କଳ ର ଏହି ପରମ୍ପରା
ଭାରି ନିଆରା ଅଟଇ,
ଶୁଣ ବାଇମନ ସତ୍ୟ ଏ ବଚନ
ହୀନ ଅନଙ୍ଗ ଭଣଇ l।