ମଣିଷ ମୁଁ ( ଭାଗ -୬ )

ଜୀବଙ୍କ ମଧ୍ୟରେ ମଣିଷ ମୁହିଁ,

ଏ ସବୁ ସଂସାର ମୋହରି ପାଇଁ l

ଭଗବାନଙ୍କର ଏହି ଉପହାର,

ଭୋଗିବାକୁ ଅଛି ମୋ ଅଧିକାର l

ସଂସାର ସୁଖକୁ ଭୋଗିବା ପାଇଁ,

ହୋଇଛି ଜନମ ମୋହର ଭାଇ l

ମଦ ମାଂସ ସାଥେ ଯୁବା ଯୁବତୀ,

ଜୁଆ ଖେଳି ସୁଖ ଭୋଗିବି ନିତି l

ଅଛି ମୋ ପାଖରେ ଧନ ସଂମ୍ପତ୍ତି,

ସୁଖ ଭୋଗିବାକୁ ଅଛି ଶକତି l

ଦାମୀ ପୋଷାକ କରେ ପରିଧାନ,

ସମାଜରେ ପାଇବାକୁ ସମ୍ମାନ l

ସୁଖରେ ଚଳୁଛି ମୋର ସଂସାର,

ଅନ୍ୟର କରିବି କିମ୍ପା ବିଚାର l

ମୁଣ୍ଡର ଝାଳ ତୁଣ୍ଡରେ ମାରି,

ମୋ ପଡୋଶୀ କରେ ନିତି ମଜୁରୀ l

ନିତି ମାଉସ, ମୋ କୁକୁର ଖାଏ,

ଉପାସରେ ମୋର ପଡୋଶୀ ଶୁଏ l

ମୁଣ୍ଡ ଗୁଞ୍ଜିବାକୁ ନାହିଁ କୁଡ଼ିଆ,

 ତା ପାଖେ ମୋ କୋଠା ହୋଇଛି ଠିଆ l

ମୋ ପଡୋଶୀ ଶୁଏ ଭୂମି ଉପରେ,

ମୁଁ ଶୋଉଅଛି ଗଜ ପଲଙ୍କରେ l

ଶହେ ଜାମା ଖାତା ଅଛି ବ୍ୟାଙ୍କରେ,

ଭିକାରି ଫେରଇ ଖାଲି ହାତରେ l

ଅସୁବିଧା କିଛି ନାହିଁ ତ ମୋର,

କାହିଁକି କରିବି ପରୋପକାର l

ସମାଜେ ପ୍ରଶଂସା ହୁଅଇ ମୋର,

ମାଲିକ ମୁଁ ସଭିଏଁ ମୋ ଚାକର l

ସଭିଙ୍କଠୁଁ ଶ୍ରେଷ୍ଠ ଅଟଇ ମୁହିଁ,

ସମାଜେ ସ୍ୱତନ୍ତ୍ର ସ୍ଥାନ ଅଛଇ l

କାହିଁକି କରିବି ମୁଁ ଜପତପ,

ଏ ଜୀବନେ କିଛି କରିନି ପାପ l

ସୁଖରେ କଟଇ ଦିନ ମୋହର,

 ଖୁସିରେ ଚାଲିଛି ମୋ ପରିବାର l

ମୋର ପ୍ରତିମୂର୍ତ୍ତି ହୁଅଇ ପୂଜା,

ମୋ ନାମେ ଉଡ଼ଇ ବିଜୟ ଧ୍ୱଜା l

କିଛିତ ଅଭାବ ନାହିଁ ମୋହର,

କାହିଁକି ପୂଜିବି ଶିବ ଶଙ୍କର l

କହିଲେ କହନ୍ତୁ କଥା ହଜାର,

ମୁଁ ଭଲ ଆଉ ସବୁ ବେକାର l