ମାଣବସା ଗୁରୁବାର

ଆମ ଉତ୍କଳରେ ମାସ ମଗୁଶୁରେ

ମହାଲକ୍ଷ୍ମୀ ନାମେ ଧ୍ବଜା,

ମା' ପୁରପଲ୍ଲୀରେ ପ୍ରତି ଘରେ ଘରେ

ଗୁରୁବାରେ ପାଏ ପୂଜା,

ନୂଆ ଶୁକ୍ଳ ଧାନରେ

ଖଟୁଲି ଉପରେ ଶେରମାଣ ଆଖୁ

ଅଦା, କଦଳୀ, ମୂଳାରେ,

ନବବଧୂ ନୂତନ ବସ୍ତ୍ରରେ ।

ଗେଣ୍ଡୁ, ପଦ୍ମ ଫୁଲ, ହଳଦୀ, ସିନ୍ଦୂର

ସାଥେ କଜ୍ଜ୍ବଳ, କଉଡ଼ି,

ନାରୀଙ୍କର ଯାହା ଯାହା ଆବଶ୍ୟକ

ରଖଇ ସବୁ ସଜାଡ଼ି,

ଉତ୍କଳୀୟ ରମଣୀ

ଧୋଇ ଘରଦ୍ବାର, ଲିପି ପରିଷ୍କାର

ଝୋଟିରେ ମଣ୍ଡାଏ ପୁଣି,

ଅଷ୍ଟଦଳ ପଦ୍ମରେ ମଣ୍ଡଣି ।

ସଂକ୍ରାନ୍ତି କଳାରେ କିଏ ପାଞ୍ଚ ପାଳି

କିଏ ପୂର୍ଣ୍ଣିମା କଳାରେ,

କିଏ ଶୁଭ ଦିନ ପାଞ୍ଜି ଅନୁଧ୍ୟାନ

ପୂଜଇ ଗୋଟିଏ ବାରେ,

ପ୍ରଥମାଷ୍ଟମୀ ପରେ

ଅତ୍ୟନ୍ତ ଶୁଭଦାୟକ ଗୁରୁବାର

ଯେବେ ପ୍ରଥମାଷ୍ଟମୀରେ,

ଉତ୍କଳର ପଞ୍ଜିକାନୁସାରେ ।

ଲକ୍ଷ୍ମୀ ପୁରାଣରେ ହୋଇଛି ବର୍ଣ୍ଣିତ

ମାଆଙ୍କ କୀରତି ଗାଥା

ଅତ୍ୟନ୍ତ ଦୁଃଖିନୀ ଶ୍ରୀୟା ଚଣ୍ଡାଳୁଣୀ

ତାଙ୍କ ପାଦେ ରଖି ମଥା,

ପୁତ୍ରବତୀ ହୋଇଲା

ଧନଧାନ୍ୟ ଗୋପଲକ୍ଷ୍ମୀରେ ତା' ଘର

ଭରପୂର ହୋଇଗଲା,

ମାଆ କୃପା ବୃଷ୍ଟି କରିଥିଲା ।

ଚଣ୍ଡାଳ ଦ୍ବାରକୁ ଯାଇଥିଲେ ବୋଲି

କମଳିନୀ ଲକ୍ଷ୍ମୀ ମାତ,

ଭାଇଙ୍କ ରୋଷରେ କଟୁ ବଚନରେ

ତ୍ୟାଗ କଲେ ଜଗନ୍ନାଥ,

ବଡ଼ ଦେଉଳେ ସ୍ଥାନ

ଦେଲେ ନାହିଁ ବୋଲି ସମୁଦ୍ର କୂଳରେ

ନବ ମନ୍ଦିର ନିର୍ମାଣ,

କଲେ ବିଶ୍ବକର୍ମା ଆସି ଜାଣ ।

ସେ ଠାବରେ ରହି କୋପଭର ହୋଇ

ଶିରୀମନ୍ଦିର ଶ୍ରୀହୀନ,

ଲକ୍ଷୀଛଡା ହୋଇ ବୁଲି ଦୁଇ ଭାଇ

ଲଭି କ୍ଷୁଧାର କଷଣ,

ଶେଷରେ ଚଣ୍ଡାଳୁଣୀ

ହସ୍ତୁ ଖାଦ୍ୟ ଖାଇ ତୃପ୍ତ ଦୁଇ ଭାଇ

ନିଜର ତ୍ରୁଟିକୁ ଜାଣି,

ଥିଲେ ତାଙ୍କୁ ଶ୍ରୀମନ୍ଦିର ଆଣି ।

ଜଗତର ମାତାପିତାଙ୍କର ଏହି

ମାନବଲୀଳା ଉଦ୍ଦେଶ୍ୟ,

ଜାତି, ବର୍ଣ୍ଣ ଅସ୍ପୃଶ୍ୟତା ନିବାରଣ

କାରଣ ଥିଲା ଅବଶ୍ୟ,

ଯାହା ଶୁଣି ମାନବେ

ହୀନମନ୍ୟ ଭାବ ହଟାଇ ମନରୁ

ସକଳେ ପ୍ରେମେ ବାନ୍ଧିବେ,

ମାନବିକତା ଗୁଣ ଉଦ୍ଭବେ ।

ପତ୍ନୀକୁ ରୋଷରେ ପୁରୁଷ ତ୍ୟାଗୀଲେ

ହୁଅଇଟି ହତଲକ୍ଷ୍ମା,

ଦେଇଥିଲେ ମାତା ଜଣାଇ ଏକଥା

ପ୍ରଭୁଙ୍କୁ ସେ କରି କ୍ଷମା,

ଯାହା ଜାଣି ମରତ

ପତ୍ନୀର ସମ୍ମାନ ରଖିଥିବେ ଉଚ୍ଚ

ଚେତନା ଜାଗାଇ ଚିତ୍ତ,

ସର୍ବ ମଙ୍ଗଳ ହେବା ନିମିତ୍ତ ।

ସେହି ଦିନଠାରୁ ଅଦ୍ୟାବଧି ଯାଏ

ପିଢ଼ି ପରେ ପିଢ଼ି ଏଠି,

ଧନ ପ୍ରାପ୍ତି ଅର୍ଥେ ଶ୍ରୀମହାଲକ୍ଷ୍ମୀଙ୍କୁ

ରଖନ୍ତି ପକାଇ ଗଣ୍ଠି,

ଗୃହାଙ୍ଗାନାଏଁ ଓଷା,

ବରଷକେ ଥରେ କରନ୍ତି ପାଳନ

ଗୁରୁବାର ମାଣବସା,

ସର୍ବେ ସୁଖେ ବାନ୍ଧିବାକୁ ବସା ।