ମାଣବସା ଗୁରୁବାର
ମାଣବସା ଗୁରୁବାର
ଆସିଗଲା ମଗୁଶୁର ଲୋ
ମାଆ ଲକ୍ଷ୍ମୀଙ୍କ ପୂଜା,
ଚାରିଆଡେ ବାନା ଉଡ଼ଇ
ତାଙ୍କ କରୁଣା ଧ୍ୱଜା l
ଶୁଦ୍ଧ ଗୋମୟ ରେ ଲିପନ୍ତି
ନିଜ ଘର ଅଗଣା,
ପ୍ରତ୍ୟୁଷ ବେଳାରୁ ଉଠନ୍ତି
ତ୍ୟାଗୀ ନିଜ ବିଛଣା l
ଅତି ଯତନରେ ପିଠଉ
କରି, କାଟନ୍ତି ଝୋଟି,
ଗାଈ ଘିଅ ଦୀପ ସଜାନ୍ତି
କରିବାକୁ ଆଳତୀ l
ନୂଆଁ ଶୁକ୍ଲ ଧାନ ବିଲରୁ
ଅତି ଯତନେ ଆଣି,
ପୂଜା ପାଇଁ ଥିବା ମାଣରେ
ତାକୁ ରଖନ୍ତି ପୁଣି l
ମାଣ ନ ଥୋଇଣ ପୂଜାଟି
ନୁହେଁ କେବେ ସମ୍ପନ୍ନ,
ମାଣବସା ଗୁରୁବାର ଲୋ
ନାମେ ବିଖ୍ୟାତ ଜାଣ l
ଆଲୋକର ବିନା ଅନ୍ଧାର
କେବେ ନୁହଁଇ ଦୂର,
ଆତ୍ମା ବିନା ଯେହ୍ନେ ଅପୂର୍ଣ୍ଣ
ଅଟେ ଆମ ଶରୀର l
ଡେଣା ବିନା ଯେହ୍ନେ ବିହଙ୍ଗ
ଉଡି ନପାରେ ନଭେ,
ମାଣ ବିନା ଲକ୍ଷ୍ମୀ ପୂଜାଟି
ପୂର୍ଣ୍ଣ ନୁହଁଇ କେବେ l
ମଗୁଶୁର ଗୁରୁବାର ଟି
ମାଣବସାର ନାମେ,
ଚିର ପ୍ରଚଳିତ ଅଟଇ
ପୂଣ୍ୟ ଏ ଧରାଧାମେ l
ପ୍ରତ୍ୟୁଷ ସ୍ନାହାନ ସାରିଣ
ପିନ୍ଧି ଝିନ ବସନ,
ଷୋଳକୋଠି ପଦ୍ମ କାଟନ୍ତି
ସର୍ବ ସଧବା ଗଣ l
ଶଙ୍ଖ ଘଣ୍ଟ ହୁଳହୁଳି ରେ
ପୁରି ଉଠଇ ଘର,
ଖଟୁଲି ଉପରେ ମାଆଙ୍କ
ମୂର୍ତ୍ତି ଦିଶେ ସୁନ୍ଦର l
ନା ନା ଫୁଲଫଳ ମିଷ୍ଠାନ୍ନ
ଅର୍ପି,ମାଆଙ୍କୁ ଭୋଗ,
ପଦୁଅଁ ଫୁଲରେ ସରାଗ
ଥାଏ ମାଆଙ୍କ ଆଗ l
ଅନାସକ୍ତ ଭାବ ହୃଦୟ
କରି,ପବିତ୍ର ମନ,
ସୁଫଳ ମିଳଇ ଜୀବନେ
କଲେ ମା ଙ୍କୁ ପୂଜନ l
ରାଗ, ହିଂସା, ଦ୍ୱେଷ ବହିଣ
ଯେଉଁ ନାରୀ ପୁଜଇ,
ରୋଷ ବହି ମାଏ ତାଠାରୁ
ଯାଇ ଥାନ୍ତି ଦୁରେଇ l
ନର ଠାରୁ କୀଟ ପର୍ଯ୍ୟନ୍ତ
ଯେତେ ସୃଷ୍ଟିରେ ଜାଣ,
ସରବେ ସମାନ ଅଟନ୍ତି
ମାଆ ଆଖିରେ ଶୁଣ l
ଶ୍ରୀୟା ଚାଣ୍ଡାଳୁଣୀ ପୂଜିଲା
ରଖି ପବିତ୍ର ଭାବ
ତାର ପୂଣ୍ୟଫଳ ତାଠାରୁ
ଆଉ କିଏସେ ନେବ l
ଲକ୍ଷ୍ମୀ ପୁରାଣରେ ଯେତେକ
ଅଛି ନୀତି ନିୟମ,
ପ୍ରାପତ କରିବା ମାଆଙ୍କୁ
କରି ତାର ପାଳନ l
ମାଣବସା ଗୁରୁବାର ରେ
ଆସ ଶପଥ ନେବା,
ଜାତି ଭେଦଭାବ ସମାଜୁଁ
ଆମେ ଦୁରେଇ ଦେବା l
ସମାଜର ମାର୍ଗଦର୍ଶକ
ଅଟେ ଲକ୍ଷ୍ମୀ ପୁରାଣ,
ପବିତ୍ର ମନରେ କରିବା
ଆସ ତାକୁ ଗାୟନ l।