କରୋନା

ପକ୍ଷୀ ନୀଡ଼ ଭାଙ୍ଗିଲେ

ଭାଙ୍ଗେ ଭରସାର ହାଡ଼

ଯେବେ ଶିକାରୀ ପ୍ରେମରେ 

ନିଜକୁ ନିଜେ ପକ୍ଷୀ,

ଗଛ ହେଇ କି ଲାଭ

ଆକାଶେ ଆବେଗକୁ

ଅଟକେଇଦେବାକୁ ସମର୍ଥ

ଘୃଣାର ପାହାଡ଼ ।

ଛାତି ଖୋଲିବତ ଖୋଲ

ଖାଁ ଖାଁ ସବୁ ରାସ୍ତା

ନିଛାଟିଆ ପାଟ ବିଲ 

ଦେଖିଯାଅ ଦେଖିଯାଅ

ପକ୍ଷୀ ହୃଦୟରେ ଆଜି

ପ୍ରେମ ପାଇଁ ବାଡ଼ ।

ଆକାଶ ଠୁ ଅନ୍ଧାର 

ଏବେ ଭଲ

ଗଛ ଡାଳ ମିଛ

ସମ୍ପର୍କରେ ସଂକ୍ରମଣ

ଆଖି ଲୁହକୁ ହାତ ମନା

ନିଶ୍ୱାସକୁ କବାଟ

ପାଟ ,ପେଟ, ପାଟି

ଭୋକ,ଭେକ ,ଛାତି

ସବୁର ଅଲଗା ତୁଠ ।

ଆଖି ପାଇଁ ହାତ ନାଇଁ

ପାଟି ନାଇଁ ପେଟ ପାଇଁ

ମିଛ ଅହଂକାରର ଡେଣା 

ଓହ୍ଲେଇ ଦେ ପକ୍ଷୀ

ସବୁଜ ମରୁଭୂମିରେ ଆଜି

ଆଶଂକାଗ୍ରସ୍ତ ବୁଢ଼ୀ ଅସୁରୁଣୀର 

ଫରୁଆ ଭିତରେ ଜୀବନ

ନିର୍ବାଣର ରାସ୍ତା ମଝିରେ

କେତେ କେତେ ନର୍କ ।