କରୋନା ମନବୋଧ ଚଉତିଶା
କରୋନା ମନବୋଧ ଚଉତିଶା
କ- କରନା କୋଭିଡ଼ରେ ଦୁନିଆ କାବୁ,
କାହାକୁ ଜଣାନାହିଁ କୁଆଡ଼େ ଯିବୁ ରେ ।
ଖ- ଖଟିଖିଆ ମରନ୍ତି ଉପାସ ଭୋକେ,
ଖତେଇ ହୋଇ ଶତ୍ରୁ ପାଖକୁ ଡାକେ ରେ ।
ଗ- ଗାଆଠୁଁ ସହରକୁ ଯେଉଁଠି ଦେଖ,
ଗଦାଗଦା ରୋଗୀଙ୍କ ବିକଳ ଡାକ ରେ ।
ଘ- ଘରେ ରହିବା ପାଇଁ କହନ୍ତି ସବୁ,
ଘଷି ମାଜି ସାବୁନ ହାତ ଧୋଇବୁ ରେ ।
ଚ- ଚଞ୍ଚଳ ହେଲେ ମନ ବହି ପଢ଼ିବୁ,
ଚାରିଫୁଟ ଦୂରରୁ କଥା କହିବୁ ରେ ।
ଛ- ଛଣା ଜିନିଷ କିଣି ଖାଇବୁ ନାହିଁ,
ଛାତିକୁ ଦମ୍ଭକରି ରହିବୁ ତୁହି ରେ ।
ଜ- ଜଗି ରଖି ଚଳିଲେ ନିରୋଗ ଥିବୁ,
ଜୀବନ ଥିଲେ ସିନା ଭୋଗ କରିବୁ ରେ ।
ଝ- ଝୁଣା-କର୍ପୂର ଜାଳି ରଖିବୁ ଘରେ,
ଝାଡ଼ି ଗଳାକୁ କଫ ଫିଙ୍ଗିବୁ ଦୂରେ ରେ ।
ଟ- ଟଙ୍କା ଧରିଲେ ହାତ ଧୋଇବୁ ଯାଇ,
ଟକଳା ଚିଜ କିଣି ଖାଇବୁ ନାହିଁ ରେ ।
ଠ- ଠକି ଯିବୁରେ ଗଲେ ବଜାର ବୁଲି,
ଠୁଳ ହୁଅନ୍ତି ରୋଗୀ ଯିବୁନି ଭୁଲି ରେ ।
ଡ- ଡାକ୍ତର କହୁଛନ୍ତି ଗରମ ଖାଅ,
ଡରିଲେ ହାରିଯିବୁ ସାହସୀ ହୁଅ ରେ ।
ଢ- ଢାଙ୍କି ରଖିବୁ ମୁହଁ ମାସ୍କ ଦେଇ,
ଢିଲା ମାରିଲେ ରୋଗୀ ହୋଇବୁ ତୁହି ରେ ।
ତ- ତେଲ ମାରିବୁ ନାକପୁଡ଼ାରେ ନେଇ,
ତାତି ବଢିଲେ ହେଳା କରିବୁ ନାହିଁ ରେ ।
ଥ- ଥଣ୍ଡା ଜଳରେ ରୋଗ ଜୀବାଣୁ ଥାଏ,
ଥକ୍କା ଲାଗିଲେ ଜାଣ କରୋନା ହୁଏ ରେ ।
ଦ- ଦେଖା ଯାଏନା ସିନା ଭୂତାଣୁ ଥାଏ,
ଦୂରେ ରହିଲେ ଲୋକ ନୀରୋଗ ରହେ ରେ ।
ଧ- ଧରିବୁ ଯଦି ଧାତୁ ଟଙ୍କା ପଇସା,
ଧୋଇବୁ ସାବୁନରେ ହାତ ସହସା ରେ ।
ନ- ନିଜ ଦେହକୁ ନିଜେ ଯତ୍ନ କରିବୁ,
ନିଜର ହୋଇଲେ ବି ଦୂରେଇ ଥିବୁ ରେ ।
ପି- ପାଖକୁ ଯିବୁନାହିଁ ରୋଗୀ ଶବର,
ପାଞ୍ଚ ଫୁଟ ଦୂରରୁ ନେବୁ ଖବର ରେ ।
ଫ- ଫଳ ଖାଇବୁ ସିନା ଧୋଇବୁ ଆଗ,
ଫିଙ୍ଗିବୁ ବାସିଖାଦ୍ୟ ତାଜା ଖାଇବୁ ରେ ।
ବ- ବାଟ ଘାଟରେ ଛେପ ଫିଙ୍ଗିବୁ ନାହିଁ,
ବିନା କାମରେ କେବେ ବୁଲିବୁ ନାହିଁ ରେ ।
ଭ- ଭିଟାମିନ ସି ଖାଇବୁ ଗୋଟେ ଦିନକୁ,
ଭରସା କରିବୁନି କାହା କଥାକୁ ରେ ।
ମ- ମାସ୍କ ପିନ୍ଧୁଥିବୁ ନାକ ଘୋଡ଼େଇ,
ମୁହଁ ନାକରେ ହାତ ମାରିବୁ ନାହିଁ ରେ ।
ଯ- ଯିବୁନି ଗହଳିକୁ ରହିବୁ ଦୂରେ,
ଯଦି ଚଳୁଛି ଚଳିଯାଉ ଅଳ୍ପରେ ରେ ।
ର- ରଖିବୁ ଯତନରେ ଖାଇବା ଚିଜ,
ରହିବୁ ସାବଧାନେ ନ ରଖି ଲାଜ ।
ଲ- ଲକ୍ଷଣ ଥାଉ ବା ନଥାଉ ଦେହରେ,
ଲୁଣ ଗରମ ପାଣି ଦେବୁ ଗଳାରେ ରେ ।
ଶ-ଶିଖାଇ ଦେବୁ ନିଜ ଘରଲୋକଙ୍କୁ,
ଶାନ୍ତିରେ ଥିବୁ ଜଗି ନିଜ ସ୍ୱାସ୍ଥ୍ୟକୁ ରେ ।
ସ୍ୱାସ୍ଥ୍ୟ ଆମ ସମ୍ପଦ ଅକ୍ଷୟ ଧନ,
ସୁଖ ଭୋଗିବୁ ସିନା ଥିଲେ ଜୀବନ ରେ ।
ହ- ହରି ଭରସା କରି ଥିବୁରେ ମନ,
ହାରିବୁ ନାହିଁ ଆଶା ହୋଇବୁ ଟାଣ ରେ ।
କ୍ଷ- କ୍ଷୀର-ହଳଦୀଗୁଣ୍ଡ ପିଇବୁ ଦେଖି,
କ୍ଷମା ମାଗିବୁ ନିଜ ଇଷ୍ଟଙ୍କୁ ଡାକି ରେ ।
#ସିଧାକଥା