କର୍ମ ହିଁ ଭଗବାନ

ନାହିଁ ମୋର ସେ ଅଧିକାର

 କରି ପାରିବି କାହା ପାଶେ ଅଳି, 

ଦୁନିଆ ଆଗରେ ସାଜିଛି ପରା

  ମୁଁ ଗୋଟେ ଜରିଗୋଟାଳି ।

ଗାଆଁ ଗାଆଁ ବୁଲେ ଜରିର ସନ୍ଧାନେ

  ମିଳେ କେତେ ଲାଞ୍ଛନା ,

ସବୁ କିଛି ତୁଚ୍ଛ ମୋ ଆଗରେ

  ପାଇ ଯାଏ ଯଦି ଅଳିଆ ଆବର୍ଜନା । 

ସାଉଁଟି ନିଏ ମୁଁ ଭାବି 

     ତାକୁ ହୀରା ମୋତି, ,

ଯାହାକୁ ତୁମେ ଦିଅ ଫୋପାଡି

   ଭାବି ଅଦରକାରୀ । 

ନିଜକୁ ନେଇ କରେ ମୁଁ ଗର୍ବ

  ସାଜି ନାହିଁ ମୁଁ ଚୋର ,

ପେଟ ପୋଷିବାକୁ ଆପଣାଇ ନାହିଁ

  କେବେ ରାସ୍ତା ଅବାଟର । 

ନିଜ ସ୍ୱାଭିମାନକୁ ନେଇ

  ସଦା ରୁହେ ମୁଁ ଅଟଳ ,

ଦୁନିଆ ସଙ୍ଗରେ ଯୁକ୍ତି କରିବାକୁ

   ନାହିଁ ମୋର ବଳ । 

ସହି ଯାଏ ମୁଣ୍ଡ ପାତି 

      ସବୁ ନିର୍ଯ୍ୟାତନା ,

ଟଙ୍କା ଲୋଭରେ ଦୋଷ କରିବାକୁ

  ହୁଏ ନାହିଁ ବାଟବଣା । 

ଭାବି ନାହିଁ କେବେ କାମକୁ

     ମୋର ହୀନ ,

ପିଲାଟି ବେଳୁ ଶୁଣି ଆସିଛି

  କର୍ମ ହିଁ ଭଗବାନ । । ।