କଲମ ମୁନ
କଲମ ମୁନ
ଆଖିର ଲୁହକୁ, ଯେବେ ମୁଁ ପିଇଛି,
କଲମ ମୁନରୁ, କବିତା ଝରିଛି ।
ବିରହ ନିଆଁରେ, ଯେବେ ମୁଁ ଜଳିଛି,
କଲମ ମୁନରୁ, କବିତା ଝରିଛି ।
ଜୀବନ ବାଟରେ, ଚାଲୁଥିଲା ବେଳେ,
ଅନ୍ୟାୟ ବିରୁଦ୍ଧେ ଲଢୁଥିଲା ବେଳେ,
ଅନ୍ଧାରକୁ ଦେଖି, ଯେବେ ମୁଁ ଡରିଛି,
କଲମ ମୁନରୁ, କବିତା ଝରିଛି ।
ଆଶା ଆକାଂକ୍ଷାର, ମାନେ ତ ଜୀବନ,
ଉଦ୍ଦେଶ୍ୟ ବିନା କି, ରହିବ ଜୀବନ,
ଇଚ୍ଛା ଯେବେ ମନ, ଭିତରେ ମରିଛି,
କଲମ ମୁନରୁ, କବିତା ଝରିଛି ।
କାଗଜ କଲମ, ଭାଷା ସାହିତ୍ୟରେ,
କବିଙ୍କ ମେଳରେ, କବିତା ଆସରେ,
ଲୁହ ପୋଛି ଯେବେ, ହସି ମୁଁ ପାରିଛି,
କଲମ ମୁନରୁ, କବିତା ଝରିଛି ।