କଳାଧନ

ଏଇ କଳାଧନ ଆଜି ହେଲା ମୋର କାଳ

କରିଥିଲି ତାକୁ ବହୁ ଯତନରେ ଠୁଳ ।

ଖଟାଇ ସବୁ କଳ ବଳ ଛଳ କୌଶଳ 

ଗୋପନେ ସଞ୍ଚିଥିଲି ମୁଁ ଅର୍ଥ ପାଗଳ ।

ଲୁଟି କରି ଦେଶ ଆଉ ଜାତିର ସମ୍ବଳ

ଗଢ଼ି ଥିଲି କେତେ ପାପର ଦେଉଳ ।

ଦାନ ଧର୍ମ ନାମେ ଚାଲେ ଯେତେ ଖେଳ

ଆନର କଳା ଟଙ୍କା ମୁହିଁ କରଇ ଧବଳ ।

ଖର୍ଚ୍ଚରେ ଦୁର୍ବଳ ହିସାବ ମୋହର ସବଳ 

ହରିବାକୁ ପର ଧନ ସଦା ମୁଁ ବ୍ୟାକୁଳ ।

ଭାଗ୍ୟ ରବି ମୋର କି ସତେ ଗଲେ ଅସ୍ତାଚଳ

ସାଗର ଦୁଲଣୀ ଚଞ୍ଚଳା ହୋଇଲେ ଅଚଳ ।

ବିଧି ହେଲା ବାମ ପୁରିଲା ମୋ' କାଳ 

ନିମିଷକେ ମୁହିଁ ହୋଇଲି କମ୍ପିତ କାଙ୍ଗାଳ ।

ମନରେ ହୁତୁ ହୁତୁ ଜଳେ ହତାଶା ଅନଳ 

ଖାଇବାକୁ ଆଜି ଖୋଜେ ମୁଠାଏ ପଖାଳ ।

ଏଡିକି ପାରିବି ଲେଖା ଯେ କପାଳ

ମିଳିବନି ତ୍ରାହି ଗଲେ ବି ପାତାଳ ।

ଯେବେ ସୁଧୁରିବ ଆମ ଶାସନ କଳ

ଦେଶ ଲାଗି ଆସିବ ଶୁଭ ସକାଳ ।