କିଚିରି ମିଚିରି ଚଟକ ଚିଆଁ
କିଚିରି ମିଚିରି ଚଟକ ଚିଆଁ
କିଚିରି ମିଚିରି ଚଟକ ଚିଆଁ
ଶିଖି ଖଣ୍ଡିଉଡା ମାରଇ ଡିଆଁ
ମାଆ ପାଶେ କରେ ଅଳି
ଖୁମ୍ପିଝୁମ୍ପି ଖାଏ ଥଣ୍ଟରୁ ଆଧାର
ମାଆର ଗଣ୍ଠି ସଙ୍ଖାଳି ।
ମାଆ ତାକୁ କରେ କେତେ ଆକଟ
ଦୂରକୁ ଯାଆନା ଥାଆ ନିକଟ
ତୁ ମୋ ନୟନ ତାରା
ନ ଦେଖିଲେ ତୋତେ ଦିଶିବନି ମୋତେ
କିଛି ବାଟ ଘାଟ ପରା ।
ଚିକିମିକି ଖରା ପିଣ୍ଡୁଳା ନିଆଁ
ଦିଶିବ ଆକାଶ କଇଁ ଫୁଲିଆ
ଉଇଁବ ସୁନା ସୂରୁଜ
ଚିଆଁ ସୁନା ମୋର ନିଦରୁ ଉଠିବ
କରିବ ମଜା ମଉଜ ।
ଝାଡି ଝୁଡ଼ି ଦେବି ଡେଣା ତୋହର
ଗଜୁରି ଉଠିବ ନୂତନ ପର
ରଙ୍ଗ ଭରି ନୂଆ ନୂଆ
ନୀଳ ଆକାଶରେ ଉଡିବୁ ବୁଲିବୁ
ମାରିବୁ ତୁ ଉଚ୍ଚ ଡିଆଁ ।
ଉଡ଼ି ଉଡ଼ି ଯାଏ ଭସା ବାଦଲ
କଳାଧଳା ରୂପ ଭିନ୍ନ ପ୍ରକାର
ଝଟକନ୍ତି ଜହ୍ନ ତାରା
ମୋ ଜୀବନ ଧନ ରଙ୍କର ରତନ
ହେବ ବଡ଼ ସୁନା ପିଲା ।
ଧୂଳିମଳି ଝାଡି ହୋଇବୁ ସଫା
ନିର୍ମଳ ଯା ମନ ଜଗତଜିତା
ଉଡିବୁ ତୁ ଯେତେ ଦୂର
କେତେ ନୂଆ ନୂଆ କଥା ତୁ ଜାଣିବୁ
ଦୂରବନ୍ଧୁ ପ୍ରିୟ ଭଲ ।
ମିଠା ମିଠା ଫୁଲ ଫଳ ମହକ
ମୁକ୍ତ ଆକାଶର ନୂଆ ପୁଲକ
ମନରେ ଭରିବ ତାତି
ଚତୁର ମୋ ଚିଆଁ ଉଠିବ ଚମକି
ମନ ମୋ ଉଠିବ ନାଚି ।
କୁନା କୁନି ଆସ ଗାଇବା ଗୀତ
କରିବାନି ମୋଟେ ଅଳି ଅଝଟ
ପଢ଼ିବା ଲଗାଇ ମନ
ମାଆ ବାପା ଗୁରୁ ହିତ ଉପଦେଶେ
ଜୀବନ ହୁଅଇ ଧନ୍ୟ ।
-----------------