ଖୁସିରେ ଚଳିବେ ପିଲା
ଖୁସିରେ ଚଳିବେ ପିଲା
ବୁଲା ବାପା ତମେ କେତେ ବୁଣିଲଣି
ମୋଅର ହେଲାଣି ଚାରି ,
ଏ ଟୋକେଇ ପରା ବିକିବାକୁ ଯିବ
ସଅଳଟି ଦେଲେ ସାରି ।
ଆଣିଲେ ପଇସା କିଛି...
ଘର ଖରଚ୍ଚରେ ଲାଗିବଟି ସବୁ
ହିସାବ ବହୁତ ଅଛି ।
ରେବ ପାଇଁ ହେବ ହାତଘଡ଼ି ,ଚୁଡ଼ି-
ଝୁମୁକା,ଟିକିଲି-ଛତା ,
ବୁଲାର ପେଏଣ୍ଟ ,କିରିକେଟ ବ୍ୟାଟ-
ଖାତା ଆଉ ହଳେ ଜୋତା ।
ତୁମଲାଗି ଗଞ୍ଜି, ଗାମୁଛା ଆଣିବ
ପୁରୁଣା ହେଲାଣି ଇଏ ,
ରଖି ଦେଇଥିବ ସେ ସବୁ ପିନ୍ଧିବ
ଘରକୁ ଆସିଲେ କିଏ ।
ଗଲା ସପ୍ତାହରୁ ତେଲ,ଲୁଣ ଅଛି
ଫୁଟଣ ଯାଇଛି ସରି ,
ହାଟରୁ ଆସିଲାବେଳକୁ ଆଣିବ
ତାକୁ ଟିକେ ମନେ କରି ।
ଆର ସପ୍ତାହକୁ ଅଧିକ ବୁଣିବା
ପାଛିଆ,ଟୋକେଇ-ଡାଲା ,
ବଳକା ପଇସା କିଛିଟା ସଞ୍ଚିବା
ଖୁସିରେ ଚଳିବେ ପିଲା ।।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ ।