ଖବର ଦେଲେ ସେ ଆସି
ଖବର ଦେଲେ ସେ ଆସି
ନରଣ ପୁରରେ ବାଘ ମାତିଥିଲା
ଆତଙ୍କରେ ଥିଲେ ଲୋକ,
ରାତି ଅଧ ତେଣେ ଦିନ ଦ୍ବିପହରେ
ଛକୁଥିଲା ଆଖପାଖ ।
ନିରାପଦ ଜମା ନ ଥିଲା ଅଞ୍ଚଳ
ଜନଗଣ ହୋଇ ମେଳି,
ବାଜା ବାଣ ଆଉ ସତର୍କତା ସହ
ଜମିଦାର ପାଶେ ମିଳି ।
ଗୁହାରି କରିଲେ ତାଙ୍କରି ସମସ୍ୟା
ଘେନା ହେଉ ମହାମନା,
ପ୍ରତିକାର ନିଶ୍ଚେ କରିବି ବୋଲି ସେ
ଶୁଣି ଦେଲେ ଆଶ୍ୱାସନା ।
ଅଳ୍ପ କ୍ଷଣ ମଧ୍ୟେ ପ୍ରସ୍ତୁତ ହୋଇକି
ଅଶ୍ୱ ଚଢ଼ି ଗଲେ ଚଳି,
ସାଥିରେ ତାଙ୍କର ଉନ୍ନତ ମାନର
ବନ୍ଧୁକରେ ଭରା ଗୁଳି ।
ଦୁଇଦିନ ଘୂରି ଗାଆଁ ଗଣ୍ଡା ଆଉ
ଜଙ୍ଗଲ ଭିତରେ ସିଏ,
ଶେଷକୁ ଛକିକି ଗୁଳି କଲେ ଦେଖି
ଛାଡ଼ିଲା ଗର୍ଜନ ଟାଏ ।
ଶୁଣିକରି ଲୋକ ଥରହର ଏଣେ
ଖବର ଦେଲେ ସେ ଆସି,
ହେଇ ଦେଖ ତୁମ ଶତ୍ରୁ ମହାବଳ
ବାଘକୁ ଦେଇଛି ନାଶି ।
ସେ ସମ୍ବାଦ ପାଇ ଖୁସିରେ ଜନତା
କରିଲେ ତାଙ୍କର ଜୟ,
ଆପଣା ଆପଣା କାର୍ଯ୍ୟ କଲେ ଏବେ
ନ ଥିଲା ପୂର୍ବର ଭୟ ।।