କେତେ ମୁଁ ଯାଇଛି ବଢ଼ି
କେତେ ମୁଁ ଯାଇଛି ବଢ଼ି
ବାପା ଦେଉଥିଲେ ଆଠଣା ଚାରଣା
ଇସୁକୁଲ ଯିବା ବେଳେ
ଆଜି ମୁହିଁ ଜଣେ ସଫଳ ମଣିଷ
ଲକ୍ଷେରେ କୋଟିରେ ଖେଳେ
ଭୁବନେଶ୍ୱରରେ ଦଶଗୁଣ୍ଠ ଜମି
ତହିଁରେ ବିଶାଳ କୋଠା
ଗ୍ୟାରେଜ ଘରେ ମୁଁ ସାଇତି ରଖିଛି
ଦାମିଗାଡ଼ି ପାଞ୍ଚ ଗୋଟା
ଶଳା , ଶାଳୀ ଆଉ ଶଶୂର , ଶାଶୂଙ୍କୁ
ନେଇ ମୋର ପରିବାର
କେତେ ମୋ ଓଜନ ଦେଖିଲେ ଜାଣିବ
ଘରଣୀ ବେକରେ ହାର
ବାପା ବୋଉ ପଡ଼ି ଅଛନ୍ତି ଗାଆଁରେ
କାମୁଡ଼ିକି ଭିଟାମାଟି
ଲୁଚିଛପି କେବେ ଗଲେ ମୁଁ ସେଠିକି
ପ୍ରାଣପ୍ରିୟା କରେ ପାଟି
ବାପା ପେଲୁଛନ୍ତି ଭଙ୍ଗା ସାଇକେଲ
ଏଠି ମୁଁ ଚଢୁଛି ଅଡ଼ି
ଏଇଥିରୁ ଜାଣ ବନ୍ଧୁମାନେ ଆଜି
କେତେ ମୁଁ ଯାଇଛି ବଢ଼ି