ଆପଣମାନେ ହିଁ କହିବେ

ବୃତ୍ତିରେ ମୁଁ ଜଣେ ଡ୍ରାଇଭର ବନ୍ଧୁ ,

କମ୍ପାନୀରେ ଗାଡ଼ି ଚଳାଏ

ସକାଳ ନଅରେ ଡିଉଟିକୁ ଆସି

ସଞ୍ଜ ଆଠଟାକୁ ପଳାଏ ।

ଯେତେବେଳେ ହୁଏ ଓଭରଟାଇମ୍

ସେଦିନ ବାଜଇ ବାଆର ।

କବିତା ପଢ଼ିବା ଇଚ୍ଛା ଥାଏ , କିନ୍ତୁ

ଦେଖି ହୁଏନାହିଁ କାହାର ।

ପାଠଶାଠ ବେଶୀ ପଢ଼ିନାହିଁ , ହେଲେ

କଲେଜ ପର୍ଯ୍ୟନ୍ତ ଯାଇଛି

ନଲେଜ ଯାହାବି କିଛିଟା ରହିଛି

ବାପା ମାଆଙ୍କ ଠୁ ପାଇଛି ।

ମାଆ ସରସ୍ବତୀ କରୁଣା କଳସ

ଦେଇଛନ୍ତି ବୋଲି ଅଜାଡ଼ି

ଶବଦ କିଛି ମୁଁ ରୁଣ୍ଡେଇ ସାଉଁଟି

କବିତାକୁ ଦିଏ ସଜାଡ଼ି ।

ଜାଣେନା ମୋ ଲେଖା ଭଲ କି ଖରାପ

ଆପଣମାନେ ହିଁ କହିବେ

ଖୋଲିଦେଲି ଆଜି ଗୋପନ କଥାଟି

ଆଘାତ ଦେଲେ ବି ସହିବେ ।