କେବେ କେବେ ମନେପଡେ

ହସ ଲାଗେ, ମନ ଫୁଲି ଫୁଲି ଯାଏ 

  ଓଠ ଚାପି କହିବାକୁ କିଛି ଚାହେଁ, 

କେବେ କେବେ ମନେପଡେ ଯେବେ ସେହି କଥା 

  ତୁନି ତୁନି କହି ମନ ମୋହେ |

କେମିତି କେଜାଣି ସବୁ ଥିଲା ସେହି ଦିନ 

   ଚାହୁଁ ଚାହୁଁ ସବୁ ବିତି ଗଲା, 

କେବେ କେବେ ମନେପଡେ, ଭାରି ଭଲ ଲାଗେ 

  ଏବେ ସିଏ ସ୍ମୃତି ହୋଇ ରହିଗଲା |

କେହି କେହି ଦେଖି କହୁଥିଲେ ବଡ଼ ଆଦରରେ 

  ସିଏ ପରା ଆମ ବଡ଼ ବଗୁଲିଆ, 

କେବେ କେବେ ମନେପଡେ ତାର ଅଙ୍ଗ ଭଙ୍ଗୀ 

   ମନ କୁହେ ସିଏ ଗୋଟେ ବାଇଆ |

କିଛି କିଛି ତାର କଥା ଶୁଣି ଲାଗୁଥିଲା 

   ବଗୁଲିଆ ହେଲେ ବି ମିଠା ମିଠା, 

କେବେ କେବେ ମନେପଡେ ସେହି ଆମ ବାଇଆ 

   କହୁ ଥିଲା ସତେ କେତେ କଥା |

ବେଳେ ବେଳେ କରୁଥିଲା ଦର୍ଶନର କିଛି କଥା 

  ଆଉ କେବେ କିଛି ଥଟ୍ଟା ମଜା, 

କେବେ କେବେ ମନେପଡେ ସେହି ବଗୁଲିଆ ପୁଣି 

  ବାଇଆ ହୋଇ ପାଉଥିଲା କିଛି ସଜା |

ତଥାପି ସିଏ କେବେ ରହି ଯାଇ ନାହିଁ 

   ଏବେ ବି କହେ ବଗୁଲିଆ କଥା, 

କେବେ କେବେ ମନେପଡେ ଆମ ସେହି ବାଇଆ 

   ଶିଖାଏ, କହି ଅତୀତର କିଛି ଗାଥା |

ସମୟ ଚାପରେ ସିନା ବଢିଛି ଏହି ବୟସ 

  ବୁଢା ହୋଇ ନାହିଁ ଆମ ବଗୁଲିଆ, 

କେବେ କେବେ ମନେପଡେ ଏଇ ତ ଜୀବନ 

  କହେ ସଦା ଆମ ଏହି ବାଇଆ |