କାର୍ତ୍ତିକ ଅନ୍ତେ

ମଣିଷ ଜନମ ଅଟଇ ଦୁର୍ଲ୍ଲଭ

ମିଳେ କୋଟି ପୁଣ୍ୟ ବଳେ

ପ୍ରାଣୀଙ୍କ ମଧ୍ୟରେ ଶ୍ରେଷ୍ଠ ଜୀବ ଆଖ୍ୟା

ରହିଛି ଏ ମହୀ ତଳେ ।

ଭଲ ମନ୍ଦ ପାପ ପୁଣ୍ୟ ଜ୍ଞାନ ଥାଇ

ମଣିଷ ରୁ ଅମଣିଷ

ଅନ୍ୟ ଜୀବଜନ୍ତୁ ପାଳି ଥାନ୍ତି ଧର୍ମ

ଲାଳସା ମଗ୍ନ ମଣିଷ ।

ପୁରାଣରେ କାର୍ତ୍ତିକ ମାସରେ ପୁଣ୍ୟ

ହରି ନାମେ ଦାନ ଧର୍ମ

ମାସ ସାରା ହରିଙ୍କ ଭଜନ କରି

ମଣିଷ କରେନି କୁକର୍ମ ।

କାର୍ତ୍ତିକ ପୂର୍ଣ୍ଣମୀ ପରଦିନ କଥା

ମଣିଷ କୃତ ବିଧାନ

ଛାଡ ଖାଇ ଆଖ୍ୟା ସହିତ ପାଳନ

ନିହାତି ଆମିଷ ଭକ୍ଷଣ ।

ଛାଡ ଖାଇ ପ୍ରଥା,ନାହିଁ ଶାସ୍ତ୍ର ବାଣୀ

କେଉଁଠି ନାହିଁ ବର୍ଣ୍ଣନ

ଜିହ୍ୱା ଲାଳସା ର ବଶବର୍ତ୍ତୀ ହୋଇ

ଅହିଂସା ପଥ ଚୟନ ।

ଅଜବ ବିଚାର ଅଜବ ନିୟମ

ଛାଡ ଖାଇ ଆଢ଼ୁଆଳେ

ଅଗଣିତ ଜୀବ ହତ୍ୟା ହେଉଅଛି

ଛାଡ ଖାଇ ବିଧି ବେଳେ ।

ମଣିଷ ଯାହା କରୁଅଛି ଭକ୍ଷଣ

ଅନ୍ୟ ଜୀବ ଠାରୁ ଭିନ୍ନ

ଅନ୍ୟ ଜୀବ ହତ୍ୟା କରି କରେ

ନିଜ ଉଦର ପୋଷଣ ।

ଜିହ୍ୱା ଲାଳସା ଚରିତାର୍ଥ ପାଇଁ

ଛାଡ ଖାଇ ଆୟୋଜନ

ନିରୀହ ଜୀବର ଯାଉଛି ଜୀବନ

ଦିନେ ନୁହେଁ ପ୍ରତିଦିନ ।

ସଭ୍ୟ ସମାଜେ ହିନ ମାନସିକତା

ପୁଣ୍ୟ ମାସ ପରେ ପାପ

ପଶୁ ପକ୍ଷୀ ସମାଜରେ ଅଶ୍ରୁ ବନ୍ୟା

ନାହିଁ କିଛି ପଶ୍ଚାତାପ ।

କାର୍ତ୍ତିକ ପୂର୍ଣ୍ଣିମା ପର ଦିନ ନୀତି

କେଉଁ ବେଦ ଶାସ୍ତ୍ର ନୀତି

ଛାଡଖାଇ ମଣିଷର କରାମତି

ଉତ୍ପାତ ବଳେ ଉତ୍ପତ୍ତି ।

ଦୁଃଖର ବିଷୟ ମର୍ମାହତ କଥା

କିପରି କରିବା ବ୍ୟକ୍ତ

ଛାଡଖାଇ ଶୁଭେଚ୍ଛା ଗଣ ମାଧ୍ୟମେ

ହେଉଅଛି ପ୍ରଚାରିତ।

ଜୀବ ମାରିଣ ଖାଇ ମାଂସ,ସେ ପ୍ରାଣୀ

ବୈକୁଣ୍ଠରେ କରେ ବାସ

ବୁଝି ନ ପାରି ଜୀବର ଶୁଦ୍ଧ ଭାବ

ଜୀବ ମାରୁଛି ମଣିଷ ।

ଆଧ୍ୟାତ୍ମିକ ଭାବେ ହୋଇଛି ପ୍ରଣୀତ

ଜ୍ଞାନ ଚକ୍ଷୁ ଆବଶ୍ୟକ

ଜୀବ ମାରି ମାଂସ ଖାଇଲେ ହେବନି

ଦୁର୍ଲ୍ଲଭ ଜୀବ ସାର୍ଥକ ।

ଜୀବେ ଦୟା, ହରି ନାମରେ ସ୍ମରଣ

ଏହି ଉକ୍ତି ଚାଲୁ ରହୁ

ପୁଣ୍ୟ ପଥେ ପାଦ ଦେଇ ପୁଣି ପାପ

ହୃଦେ ଜାଗ୍ରତ ନ ହେଉ ।

ଛାଡଖାଇ ଶବ୍ଦ ହେଉ ଅନ୍ତର୍ଦ୍ଧାନ

ଭାଷାକୋଷର ପୃଷ୍ଠାରୁ

ଛାଡଖାଇ ନାମରେ ଶୁଭେଚ୍ଛା ବାର୍ତ୍ତା

ଲୋପ ହେଉ ସମାଜରୁ ।