କାମ ଥିଲେ ମାମୁଁମାଇଁ

ଠହକା ମାରିକି ଇମୋଜି ମୁହଁରେ 

କୁରୁଳି ଉଠଇ ହସ

ମୋବାଇଲ ବିନା ଅଚଳ ଦୁନିଆଁ

ଶୂନ୍ଯ ଲାଗେ ଦଶଦିଶ ।

ଫଣଫଣ ମୁହେଁ କଳା ମଚମଚ

ମାଗୁର ବାଘୁଆ ନିଶ

ବାଘମାମୁଁ ନୁହେଁ ପୋଲିସଙ୍କୁ ଦେଖି

ଚୋରର ଉଡଇ ହୋଶ ।

ଅଣ୍ଟାକୁ ହଲାଇ ଛଟକ ଦେଖାଇ

ଚାଲିଲେ ଫେସନବାଲି

ବିଚ ରାସ୍ତାଘାଟେ ବାଇ ବୁଲାଷଣ୍ଢ

ଦଉଡେ ଛାଡି ହମ୍ବାଳି ।

ଲଙ୍କାର କଟକେ ବନ୍ଦିନୀ ଜାନକୀ

ଅସହାୟ ପରୀକ୍ଷାର୍ଥୀ

ସପତ ସମୁଦ୍ର ଲଙ୍ଘି ହନୁମାନ 

କପିରାଜ ବିରାଜନ୍ତି ।

ପାଗ ପରିବେଶ ଫଳ ଉତ୍ତୀର୍ଣ୍ଣାଙ୍କ

ଅଥୟ ଅନିୟମିତ 

ନବେ ପ୍ରତିଶତ ରଖିପାରେ ଗଧ

ମେଧାବୀ ମାଙ୍କଡ ଚିତ ।

ଦେଲେ ହାତଗୁଞ୍ଜା ଖୋଲେ ନାଲିଫିତା

ଦରଖାସ୍ତ ନଥିପତ୍ର 

ନତୁବା ଦପ୍ତର ଧାଆଁ ଧଉଡରେ

ପାଦରୁ ଛିଣ୍ଡେ ଚପଲ ।

ସିଂହାସନ ତଳେ ପାଚିଲା ସ୍ବାଦିଷ୍ଟ 

ଫଳ ପୁଞ୍ଜିଏକୁ ଦେଖି

ବଦଳି ଯାଉଛି ବିଲୁଆ ବିଚାର

ବିଷମ ଆଇନ ଗତି ।

ଦିନରେ ଗଣନ୍ତି ତାରା ସାଧାରଣ

ଜଳକା ଭକୁଆ ହୋଇ 

ମାରି ନେଉଛନ୍ତି ସବୁ ମହାପାତ୍ର 

କାମ ଥିଲେ ମାମୁଁମାଇଁ ।