କାଳିଆରେ...

ସତରେ କାଳିଆ  ଅଛୁକି ତୁହିରେ

    ଏଇ ମାୟା ସଂସାରରେ ,

ତାହେଲେ କାହିଁକି ଏପରି ହେଉଛି

    ତୋ ସହିତ କାଳିଆରେ ।

ଷାଠିଏ ପଉଟି  ନଖାଇଲେ କାଳେ

     ରହି ତ ନ ପାରୁ ତୁହି,

ନୀତିରେ ବିଭ୍ରାଟ  କରେ ସେବାୟତ

     ଉପାସେ ପକାନ୍ତି ସେହି ।

କେତେବେଳେ ତୋର  ଭଣ୍ଡାର ଘରର

     ଚାବି ହଜିଯାଉ ଅଛି ,

ଯେତେବେଳେ ପୁଣି  ଚାବି ମିଳୁଅଛି

     ଭଣ୍ଡାର ଶୂନ୍ୟ ରହିଛି ।

କୁଆଡେ ଯାଉଛି  ତୋ ଧନ ସଂପତ୍ତି

     କିଏ ଖାଇ ଯାଉଅଛି,

ବଡ଼ ବଡ଼ ତୋର  ଆଖି ଦୁଇଟିକୁ

     ବନ୍ଦ କିଏ କରିଅଛି ।

ମନ ଇଚ୍ଛା ପଣ୍ଡେ   ବଡ଼ ଦେଉଳରେ

      କୁକର୍ମ କରନ୍ତି ପଶି ,

ସେଲଫି ନେଇକି  ଫଟୋ ଛାଡୁଛନ୍ତି

     ଆନନ୍ଦ ବଜାରେ ବସି ।

ବାଟି ବାଟି ତୋର   ସମ୍ପତ୍ତି  କାଳିଆ

      କୁଆଡ଼େ ଜଣା ପଡୁନି ,

ହାଏରେ କାଳିଆ  ତୋ ଦୁର୍ଦ୍ଦଶା ଦେଖି

     ଜମା ଏ ମନ ମାନୁନି।

ଲକ୍ଷ୍ମୀ ସାଆଁନ୍ତାଣୀ ପାଶେ ରହି ଯେବେ

     ତୋର ଏହି ପରିସ୍ଥିତି ,

ଅନୁମାନ କର   କାଳିଆ ତୁହିରେ

     ଓଡ଼ିଶାର ଅଧୋଗତି ।

ସେବାୟତ ଠାରୁ  ସରକାର ଯାଏ

      ସଭିଏଁ ଏକୁ ଆରେକ ,

ଏମିତି ଯଦି ତୁ  ନିରବେ ବସିବୁ

     ଗିଳିବେ ଅଛି ଯେତେକ ।

ନିଦା ବ୍ରହ୍ମ ରୂପେ  ପୂଜା ପାଇବୁକି

    ଏପରି ଚାଲିଲେ ନୀତି

ନିରବେ ନ ରହି   ଦେଖାରେ କାଳିଆ

     ନୟନର ଦିବ୍ୟଜ୍ୟୋତି ।

ସଂହାର କର ତୁ  ଦେଖା ତୋ' କରଣି,

      ବିନାଶ କର ପାପୀଙ୍କୁ,

ତ୍ରାହି ତ୍ରାହି ବୋଲି   ଡକା ପଡ଼ିଯାଉ

     କରିସ୍ମା ଦେଖା ସଭିଙ୍କୁ ।