କାହିଁକି କରୁଛ ଗର୍ବ

ଦିନ ସରିଗଲେ ସଞ୍ଜ ଆସିଯାଏ

ସଞ୍ଜ ସରିଗଲେ ରାତି,

ଜୀବନ ଆମର ଅଢେଇ ଦିନର

ଶେଷରେ ଦିମୁଠା ମାଟି l

କାହା ପାଇଁ ମନ ଗରବ କରୁଛୁ

କିସ ଅବା ଚିରଦିନ,

ଜନ୍ମି ଥିଲେ ଆମେ ଖାଲିହାତ ନେଇ

ଖାଲି ହାତେ ଯିବପ୍ରାଣ l

ରୂପ ଭେକ ସବୁ ଦୁଇ ଦିନ ପାଇଁ

ରହେ ନାହିଁ ଶେଷ ଯାଏଁ,

ଆଜିର କଅଁଳ ନରମ ମୁହଁଟି

ଝାଉଁଳି ବିବର୍ଣ୍ଣ ହୁଏ l

ବାହୁ ବଳେ ଯିଏ ଆଜି ବଳିୟାନ

କାଲିସେ କମ୍ପିତ ହସ୍ତ,

ଯିଏ ଥିଲା ଦିନେ ବିଶ୍ଵବିଜୟୀ

ଶେଷକୁ ହୁଏ ପରାସ୍ତ l

ଆତ୍ମୀୟ ସ୍ୱଜନ ରହିଯାନ୍ତି ପଛେ

ଅଳ୍ପ ଦିନେ ଯାନ୍ତି ଭୁଲି,

ଏକା ଆସିଥିଲେ ଏହି ସଂସାରକୁ

ଏକା ହୋଇ ଯିବା ଚାଲି l

ଧନ ଦୌଲତ ଯାଏନାହିଁ କେବେ

ସାଥେ ଆମ ଶମଶାନ,

ପୂଣ୍ୟ କର୍ମ ଆମ ସାଥେ ସିନା ଯିବ

ଆହା କହିବେଯେ ଜନ l

ଯେତେ ପାର ସେତେ ପୂଣ୍ୟ ଅରଜ

ପ୍ରଭୁଙ୍କର ଗୁଣ ଗାଅ,

ପଠାଇଛନ୍ତି ସେ ଯେଉଁ କର୍ମ ପାଇଁ 

ସେହିକର୍ମ କରି ଯାଅ l

ଦୁଃଖୀ ରଙ୍କୀଙ୍କର ସେବା କରିଥିଲେ

ପରଲୋକକୁ ପାଥେୟ,

ମାନବର ସେବା ମାଧବଙ୍କ ସେବା

ଏଥିରେ ନାହିଁ ସଂଶୟ l

ଆଜି ଅଛେ ଆମେ କାଲିକି ନଥିବା

କାହିଁକି କରିବା ଗର୍ବ,

ଅଳୀକ ଏହିଯେ ସଂସାର ଟି ପରା

ବିଞ୍ଚିଯାଅସଉରଭ ।