ଜୟ ଜଗନ୍ନାଥ
ଜୟ ଜଗନ୍ନାଥ
ଜାଣି କେ ପାରିବ ତୁମର ମହିମା
କହିବ କେବା ବିସ୍ତାରି
ଜୟ ଜଗନ୍ନାଥ ଅନାଦି ଅନନ୍ତ
ଦିନବନ୍ଧୁ ଦଇତାରୀ ।
ଚତୁର୍ମୁଖ ବ୍ରହ୍ମା ଦେବ ମହେଶ୍ବର
ମହାଜ୍ଞାନୀ ଋଷିମୁନୀ
ବେଦଶାସ୍ତ୍ର କାବ୍ଯ ପୁରାଣ ଲେଖନୀ
ମାୟା ନ ପାରିଛି ବର୍ଣ୍ଣି ।
ଚାରୁ ଚିତ୍ରଶିଳ୍ପୀ କବି ଓ ଭାବୁକ
ମାନବ ମାତ୍ରକେ ଚିନ୍ତି
ଦଶବିଧ ରୂପେ କରନ୍ତି ଚିତ୍ରଣ
ନିବେଦନ୍ତି ଭକ୍ତିସ୍ତୁତି ।
ପ୍ରଳୟ ପୟୋଧି କାଳରେ ଜଳରେ
ମୀନ ରୂପ ପ୍ରଭୁ ଧରି
ବଧି ଶଙ୍ଖାସୁର ଉଦ୍ଧରିଲ ବେଦ
ଜଗତ ଥିଲ ନିସ୍ତରି ।
କର୍ମଠ ଗରିଷ୍ଠ ବିସ୍ତୀର୍ଣ୍ଣ ମୂରତି
କଠିନ ଚକ୍ର ଆକାରେ
ପୃଷ୍ଠରେ ଧାରଣ କରିଲ କ୍ଷିତିକୁ
କଚ୍ଛପର ଅବତାରେ ।
ଧରିଛ ଶୂକର ନରସିଂହ ରୂପ
ଅଦ୍ଭୁତ ବାମନ ବେଶ
ଭୃଗୁପତି ରାମ ହଳଧର ବୁଦ୍ଧ
କଳ୍କୀ ହୋଇ କର ନାଶ ।
କଳୁଷ କାନନ କରଇ ଦହନ
ପ୍ରଭୁ ନାମ ସଙ୍କୀର୍ତ୍ତନ
ଝରେ ପଦ୍ମପାଦୁ ରସ ସୁଧାମୃତ
ଧ୍ଯାୟେ ସୁଧୀ ଭକ୍ତଜନ ।