ଜୟ ଭାରତ ଜୟ

କୋଟିଏ କଣ୍ଠେ ଗାଇବା ଆସ

ଜୟ ଭାରତ ଜୟ ,

ଜାତୀୟ ଧ୍ବଜା ଉଡ଼ାଇ ଦେବା

ହୋଇ ଆନନ୍ଦ ମୟ ।

ଆର୍ଯ୍ୟଭୂମି ଏ ପୁଣ୍ୟଭୂମି ଯେ

ସରଗ ଠାରୁ ବଳି ,

ଯେତେକ ତା'ର ଗୁଣ ଗରିମା

ପାରିଛି କିଏ କଳି !!

ଶୂର-ବୀରଙ୍କ ଜନମଦାତ୍ରୀ

ସେ ତ କଲ୍ୟାଣମୟୀ ,

ଆଦର୍ଶ ଲାଗି ହୋଇଛି ସଦା

ବିଶ୍ୱ ହୃଦୟ ଜୟୀ ।

ତାହାର ତେଜ ,ରୂପ,ବିଭବ

ଦେଖି ବଇରୀ ଜଳେ ,

ଛଡ଼ାଇ ନେବ ସକଳ ସୁଖ

ଭାବିଛି କଉଶଳେ ।

କଦାପି ତାକୁ ସେଇ ସୁଯୋଗ

ଦେବାନି ଆମେ ଛାଡ଼ି ,

ଦେଖୁଛି ଯେଉଁ ଦିବା ସ୍ୱପ୍ନ ସେ

ନେବାଟି ତାହା କାଢ଼ି ।

ବିବ୍ରତ ନୋହି ଯେତେକ ସୁତ

ସକଳେ ଥିବା ଜାଗି ,

ଆପଣା ସୁଖ ମଣିବା ସଦା

ତା' ହିତ କାମେ ଲାଗି ।

ଜପିବା ଆମେ ସଦଭାବନା

ଭାଇଚାରାର ମନ୍ତ୍ର ,

ଅଖଣ୍ଡ ହୋଇ ରହିବ ଆମ

ଭାରତ ରାଷ୍ଟ୍ର-ତନ୍ତ୍ର ।