ଜରୁରୀ ଉତ୍ତମ ଗୁଣର ଶିକ୍ଷା
ଜରୁରୀ ଉତ୍ତମ ଗୁଣର ଶିକ୍ଷା
ସମୟ ସହ ଜୀବନର ଫର୍ଦ୍ଧ ଲେଉଟୁଛି
ଆମେ ସବୁ ନାଟ୍ୟକାର
ବିଚିତ୍ର ସର୍ଜନା, ନିଜେ ନିଜ କଳା ନେଇ
ଭବ ସାଗରେ ଭାସିବାର ।
ଉପର ସୌନ୍ଦର୍ଯ୍ୟ ପଛରେ ପଡ଼ିଛେ ସର୍ବେ
ଭାବୁ ନାହେଁ ଭଲ ମନ୍ଦ
ଦେଖୁନାହେଁ ଉତ୍ତମ ଗୁଣକୁ ଅଳୀକ ସୌନ୍ଦର୍ଯ୍ୟେ
ହେଉଅଛେ ମହା ଆନନ୍ଦ ।
ଜାଣିନକି ବନ୍ଧୁ, ଅସଲ ସୌନ୍ଦର୍ଯ୍ୟ କେବେ ତ
ରୂପରେ ନ ଥାଏ
ଅନ୍ତରେ ସ୍ନେହ ମମତା ଅଭାବେ ଉପର ସୁନ୍ଦର
ହୃଦୟ ଭିତରେ ଅଙ୍ଗାର ଥାଏ ।
ବାହ୍ୟ ଚାକଚକ୍ୟ ମୂଲ୍ୟହୀନ ଅଟେ ମନଟି
ନହେଲେ ସୁନ୍ଦର
ମନୁଷ୍ୟକୁ ଚିହ୍ନିବା ମହତ୍ ଗୁଣରୁ, ଗୁଣକୁ ପରଖି
ବଢାଅ ସମ୍ପର୍କ ତୁମର ।
ମାନବର ସେବା ମାଧବର ସେବା ଭାବ ହୃଦେ
ନେଇ ଯିଏ ଗତି କରେ ଜୀବନରେ
ଏକରୁ ଅନେକ ଅନେକରୁ ଏକ, ଆଲ୍ଲା, ଯୀଶୁ
ଅବା ଭଗବାନ୍ ରହନ୍ତି ତା ହୃଦୟରେ ।
କେତେ ଯେ ବିପଦ ଆସିଛି, ଆସିବ ଜୀବନେ, ନେଇଛି ,
ନେବ କେତେ ପରୀକ୍ଷା
ହେ ମୋର ଭଉଣୀ ଭାଇ, ସବୁ ବିପଦରୁ ମୁକତି ପାଇଁକି
ଜରୁରୀ ଉତ୍ତମ ଗୁଣର ଶିକ୍ଷା ।