ଝୁଲି ଝୁଲି ଆସୁଛି ମୋ କାଳିଆ ସୁନା

ବାଜୁଅଛି ଘଣ୍ଟ    ଦିଶୁଛି ଟାହିଆ

     ପଦ୍ମ ପଳାସ ଲୋଚନ

ଅମଳିନ ହସ     ଓଠରୁ ଝରାଇ

     କରନ୍ତି କୃପା ବର୍ଷଣ

     ହେଉଛନ୍ତି ଭିଡା ଟଣା

ସାତ ପାହାଚରୁ    ଦେଖ ଝୁଲି ଝୁଲି

    ଆସୁଛି କାଳିଆ ସୁନା ।

ରତନ ବେଦୀରୁ    ଆସିଛି ଓହ୍ଲାଇ

     ପ୍ରବଳ ମତ୍ତ ବାରଣ

ବିପୁଳ ଭୂଜକୁ    ବିସ୍ତାରି ଚାଲୁଛି

     ଗତି ସୁମଧୁର ମନ୍ଦ୍ର

     କରୁଛି ଗୋଟି ପହଣ୍ଡି

କେବେ ଟେକିହୁଏ    କେବେ ଝୁଲିପଡେ

     ଛୁଉଁ ଥାଏ ପୁଣି ଭୂମି ।

ବାସେ ମହମହ    ଚନ୍ଦନ ତୁଳସୀ

     ଦୟଣା ଫୁଲ ଗଜରା

ପଡିଲେ ପହୁଣ୍ଡ     ବହଇ ମଳୟ

     ଉନ୍ମେଷଇ ପ୍ରଚୋଦନା

     ସ୍ୱସ୍ତିକ ଉଦାତ୍ତ ବାର୍ତ୍ତା

ଜାଗରିତ ହୁଏ     ଜୀବନ ଦର୍ଶନ

     ବାସ୍ତବତା ସାର୍ଥକତା ।

ବିକଶେ କମଳ   ଶାନ୍ତି ଶତଦଳ

     ଆଲୋକ ଜ୍ଞାନ ବିବେକ

ଅବବୋଧ ହୁଏ   ସବୁଜ ସୁନ୍ଦର

     ଚିରନ୍ତନ ବ୍ରହ୍ମ ସତ୍ୟ

    ସମ୍ଭବେ ସୃଷ୍ଟି ମହାନ

ଉତ୍କର୍ଷେ ପୂର୍ଣ୍ଣତା  ଭବ୍ୟ ସୁଷମତା

     ଉତ୍ତରଣ ସ°ସ୍କରଣ ।

ବିଜେ ଜଗନ୍ନାଥ   ରଥ ନନ୍ଦିଘୋଷେ

     ବାମନ ପୁରୁଷୋତ୍ତମ

ଜନମବେଦୀକୁ     ନବ ଦିନାତ୍ମକ

      ଯାତ୍ରା ପତିତପାବନ

     ବଡ଼ଦାଣ୍ଡ ଲୋକାରଣ୍ୟ

ଲଭଇ ଭକତ    ଅମୃତ ଆଶ୍ଳେଷ

     ଜୀବନ ହୁଅଇ ଧନ୍ୟ ।