ଜୀବନ ସ୍ଵପ୍ନ ------
ଜୀବନ ସ୍ଵପ୍ନ ------
ଏତେ ସପନକୁ
ରାତିନାହିଁ କହି
ସପନ ଦେଖିବା ଛାଡନାହିଁ
ସପନରୁ ଖୋଜ
ବଞ୍ଚିବାର ରାହା
ତା ବିନା ଜୀବନ ମରୁଭୂଇଁ
ସପନ ବୁଣଇ
ଆଶାର ଆଲୋକ
ଇନ୍ଦ୍ରଧନୁର ସପ୍ତରଙ୍ଗେ
ସପନବଣିକ
ବାହିପାରେ ନାଆ
ସାଗରର ଉତ୍ତାଳ ତରଙ୍ଗେ
ସପନ ଶିଖାଏ
ରାଗ ଆଶାବରୀ
ଗାଇବାକୁ ଜୀବନ ସଙ୍ଗୀତ
ସପନ ନଥିଲେ
ପ୍ରେମ ଚଇତାଳି
ପାଲଟଇ ନିଦାଘର ବାତ
ଦିଶାହୀନ ଏକ
ପଥିକର ପାଇଁ
ସପନଟି ଅଟେ ଧ୍ରୁବତାରା
ସପନ ବିହୀନ
ମଣିଷ ପାଇଁକି
ଜୀବନଟା ହୁଏ ଛନ୍ଦହରା
ସପନଟି ପରା
ଅଟେ ଭବିଷ୍ୟତ
ନିରାଶା ସାଗରେ ଆଶା ସେତୁ
ପ୍ରଗତିର ଚୂଡା
ଛୁଇଁବା ପାଇଁକି
ତାହା ଅଟେ ବିକାଶର ହେତୁ
ସପନୁ ଜନମ
ହୁଅଇ ଉଦ୍ୟମ
ଉଦ୍ୟମୁ ସପନ ହୁଏ ସତ
ଉଦ୍ୟମଟି ଦିଏ
ସପନେ ଜୀବନ
ଜୀବନକୁ କରେ ବିକଶିତ
ଉଦଯୋଗ କର
ସପନ ପାଇଁକି
ଏକରାତି ହେଉ ସାତରାତି
ଗନ୍ଧମାର୍ଦ୍ଦନରୁ
ଆସୁ ଅଉଷଧି
ଜୀବନ ପାଉ ସଉମିତ୍ରୀ
ଆଶାର ସପନେ
ସଜାଅ ଜୀବନ
ନିରାଶାକୁ ସ୍ଥାନ ଦିଅନାହିଁ
ଏତେ ସପନକୁ
ରାତିନାହିଁ କହି
ସପନ ଦେଖିବା ଛାଡନାହିଁ