ଜୀବନ ଦୀପ

ମଉଳିଲେ ଫୁଲ

ଝୁରେ ନାହିଁ ତରୁ

ଫୁଟେ ନିତି ନୂଆ ଫୁଲ,

ଉଜୁଡିଲେ ଚାଷ

ଝୁରେ ନାହିଁ ଚାଷୀ

ସଜାଏ ନୂଆ ଫସଲ। 

ବହିଗଲେ ଲୁହ

ଝୁରେନା ନୟନ

ଲଗାଏ ନୂଆ କଜଳ,

ବହିଗଲେ ପାଣି

ଝୁରେନା ତଟିନୀ

ଭେଟିଦିଏ ନୂଆ ଜଳ। 

ଝଡିଗଲେ ଫଳ

ଝୁରେନା ପାଦପ

ନୂଆ ଫଳ ଫଳି ହସେ,

ଭାଙ୍ଗିଗଲେ ନୀଡ

ଝୁରେନା ଚଢେଇ

ନୂଆ ନୀଡେ ପୁଣି ବସେ। 

ଚିରିଲେ ବସନ

ମଣିଷ ଝୁରେନା

ପିନ୍ଧେ ନୂଆ ପରିଧାନ,

ଶରୀର ଛାଡିଲେ

ଝୁରେ ନାହିଁ ଆତ୍ମା

ନୂଆ ଦେହେ କରେ ଧ୍ୟାନ। 

ଗଲା ଯିଏ ଯାଉ

ନ ଫେରିବ ଆଉ

ତା ପାଇଁ କିଆଁ ଶୋଚନା,

ଜୀବନ ଦୀପରେ

ଆଶାର ସଳିତା 

ସଦା ଜାଳ ଦୁଃଖ ବିନା।