ମୁଁ ଆଳୁ
ମୁଁ ଆଳୁ
ମୁଁ ଆଳୁ
ମନେନାହିଁ ମୋର ଜନମିଛି କେଉଁ କାଳୁ
ବିଲାତରୁ ଆସି ଭାରତେ ବଢୁଛି
ଚାହିଦା ମୋର ବଢି ଚାଲିଛି
ଫଳି ବାହାରୁଛି ମୁଁ ମାଟି ତଳୁ ।
ମୁଁ ଆଳୁ
ଚେହେରା ମୋର ପ୍ରାୟତଃ ଗୋଲଗାଲ୍
ସୁନ୍ଦର ଯେମିତି ବୁନ୍ଦିଆ ଲଡୁ
ପୃଥିବୀର ଛୋଟ ନମୁନାଟିଏ ହୋଇ ମୁଁ
ହଟେନା କେବେ ରୋଷେଇ ଶାଳୁ ।
ମୁଁ ଆଳୁ
ସବୁ ପ୍ରକାରର ପରିବା ସାଥୀରେ ମିଶେ
ବଜାରରେ ସବୁଦିନ ମୋର ଭାଉ
ଦର ଦାମ୍ ଯେତେ ଯା' ହେଉ
ସମସ୍ତଙ୍କର ହୁଏ ମୁଁ ଶ୍ରଦ୍ଧାଳୁ ।
ମୁଁ ଆଳୁ
ହୋଇ ସମସ୍ତଙ୍କର ପ୍ରିୟ
ମଧୁମେୟ ରୋଗୀଠାରେ ମୁଁ ଅପ୍ରିୟ
ଦୂରେଇ ରୁହେ ତାଙ୍କଠୁ ଜାଣିଲା ବେଳୁ
ମୁକୁଳାଇ ରଖିବାକୁ ରୋଗ ଜଞ୍ଜାଳୁ ।
ମୁଁ ଆଳୁ
ମୋତେ ନେଇ ଥଟ୍ଟା ମଜା କରନ୍ତି ସବୁ
ହାରିଗଲେ କୁହନ୍ତି ଖାଇଲୁ ଆଳୁ
ଅସଫଳତାର ପ୍ରତୀକ ଶୂନଭାବେ ମୁଁ
ବ୍ୟବହୃତ ହୁଏ ସୃଷ୍ଟି ଆରମ୍ଭ କାଳୁ ।
ମୁଁ ଆଳୁ
ଭେଦଭାବ ନାହିଁ ମୋର ବିଦେଶୀ ବୋଲି
ଭେଜାଲ୍ ହୁଏନି ରହେ ଅସଲି
ମୁଁ ଚିର ସୁନ୍ଦର ଯୁବା ଛୁଆ ବେଳୁ
ଦିନ ମୋ ସରେ ସେବା କଥା ଭାଳୁ ଭାଳୁ ।
ମୁଁ ଆଳୁ
ଜନସେବାରେ ଜୀବନ ମୋ ଉତ୍ସର୍ଗୀକୃତ
ସୁଖ ଶାନ୍ତିରେ ରହୁ ସାରା ଜଗତ
ସୁରକ୍ଷିତ ହେଉ ମହାକାଳୁ
ହସ ଖୁସିରେ ଯିଏ ଯା'ର ପରିବାର ପାଳୁ ।
ମୁଁ ଆଳୁ
ମୋ ଭିତରେ ପାଠ ଅଛି ଓଡି଼ଆରେ 'ଠ'
ଇଂରାଜୀରେ '୦'(ଓ) ଅଙ୍କରେ (ଶୂନ) '0'
ସୃଷ୍ଟିତତ୍ତ୍ବର ବିଶେଷ ସ୍ଵରୂପ ଆଳୁ
(ଠ)ଶୂନରୁ ଉତ୍ପତ୍ତି ଶେଷ ବି ହୁଏ(ଠ)ଆଳୁ
ମୁଁ ଆଳୁ ।