ନବମୀରେ ସନ୍ଧ୍ୟା ଦର୍ଶନ
ନବମୀରେ ସନ୍ଧ୍ୟା ଦର୍ଶନ
ଚାହୁଁ ଚାହୁଁ ସାତ ଦିନ ସରି ଗଲା
ଅଷ୍ଟମ ଦିବସ ଆଜି
ତିନି ଦିଅଁଙ୍କୁ ଯେ କରନ୍ତି ଦର୍ଶନ
କାଳିଆ ପ୍ରେମରେ ଭିଜି ।
ଆଡପ ମଣ୍ଡପେ ପ୍ରଭୁ ଜଗନ୍ନାଥ
ସଙ୍ଗରେ ଭଉଣୀ ଭାଇ
ଶ୍ରୀମନ୍ଦିର କାଲି ଫେରି ଯିବେ ପ୍ରଭୁ
ପୋଡପିଠାକୁ ସେ ଖାଇ ।
ଭକତଙ୍କ ଭିଡ ଲାଗିଛି ପ୍ରବଳ
ଦେଖନ୍ତି କଳା ଠାକୁର
ଏଇ ରାତି ପାହି ଗଲେ ସତେ ପ୍ରଭୁ
ହୋଇବେ ଏଠୁ ଅନ୍ତର ।
ମନରେ ବିରସ ଭାବକୁ ରଖିଣ
କରନ୍ତି ସନ୍ଧ୍ୟା ଦର୍ଶନ
ଶଙ୍ଖ ଘଣ୍ଟ ହୁଳହୁଳୀ ଶବ୍ଦେ କମ୍ପେ
ଆଡପ ମଣ୍ଡପ ସ୍ଥାନ ।
ପଞ୍ଚଦୀପେ ଜଗା ଦିଶୁଛି ସୁନ୍ଦର
ମନ ନେଉଅଛି କିଣି
ଆତ୍ମହରା ହେଉ ଅଛନ୍ତି ଭକତେ
ଦେଖି ତା ବାଙ୍କ ଚାହାଣୀ ।
ଜୟ ଜୟକାର ଶଦ୍ଦ ଶୁଭୁ ଥାଏ
ଆରତୀ ବନ୍ଦନା ହୁଏ
ଏ ସନ୍ଧ୍ୟା ଦର୍ଶନ ଏତେ ମନଲୋଭା
ଦେଖେ ଯିଏ ଜାଣି ଥାଏ ।
ସ୍ବର୍ଗର ଦେବତା ଥୟ ଧରନ୍ତି ନି
ଗୁପତେ ଆସନ୍ତି ଧାଇଁ
ନୀଳାଦ୍ରୀ ଦର୍ଶନ କରନ୍ତି ସନ୍ତୋଷେ
ପାଦେ ପୁଷ୍ଟ ଅର୍ପି ଦେଇ ।
କଥା ଦେଇଛନ୍ତି ମହାଲକ୍ଷ୍ମୀ ସେ
ଦଶମୀରେ ଫେରି ଯିବେ
ଆଡପ ମଣ୍ଡପେ ଏଇ ଶେଷ ସନ୍ଧ୍ୟା
ଦର୍ଶନ ଭକ୍ତେ କରିବେ ।
ମାଉସୀ ମା' ଙ୍କ ମନ ଭଲ ନାହିଁ
କାଲି ପ୍ରଭୁ ଯିବେ ଫେରି
ବରଷେ ପୁରିଲେ ଆସିବେ ମୋ ପାଶେ
ଭାବି ଲୁହ ଯାଏ ଝରି ।
ଭକତଙ୍କ ମନ ହେଉଛି ବିକଳ
ଯିବେ ପ୍ରଭୁ ଶ୍ରୀମନ୍ଦିର
ଏମିତି ଦର୍ଶନ ଆଉ ପାଇବେନି
ଦୁଃଖେ ହୁଅନ୍ତି ଅଧିର ।
ଦର ହସା ଓଠ ଲୁହ ଭିଜା ଆଖି
ମନରେ କେତେ ଭାବନା
ଏଇ ଜୀବ ଥିଲେ ଆର ବରଷରେ
ଦେଖିବା କାଳିଆ ସୁନା ।
ଦେଖି ଦେଲେ ଥରେ ଏ ସନ୍ଧ୍ୟା ଦର୍ଶନ
କୋଟି ପାପ ହୁଏ ଦୂର
ଦୋଷ ଧରିବନି ମୋ କଳା ଠାକୁର
ଆଶ୍ରା ଦେବ ଶ୍ରୀପୟର ।