ଜୀବନ ଚକ୍ର

ଅତୀତ ପୃଷ୍ଠାକୁ ଖେଳାନ୍ତିନି କେହି

ଭବିଷ୍ୟତେ ରହି ବ୍ୟସ୍ତ

ଭବିଷ୍ୟତ ପୃଷ୍ଠା ମଧ୍ୟେ ରହିଥାଏ

ଅତୀତ ଅନ୍ତର୍ନିହିତ ।

ବର୍ତ୍ତମାନ ପାଠ ପଢନ୍ତି ସଭିଏଁ

ଭଲ ହେଉ ଅବା ମନ୍ଦ

ଅତୀତ ବି କେବେ ବର୍ତ୍ତମାନ ଥିଲା

ନ ଥିଲା ବି ବାଡ ବନ୍ଧ ।

ବର୍ତ୍ତମାନ ପାଇଁ ଅତୀତର ଥାଏ

ଅନୁଭୂତି କର୍ମରତ 

ସେଥିରୁ ଶିକ୍ଷା ଯେ ନ ନେଲା ଜୀବନେ

ଭବିଷ୍ୟତ ଅନିଶ୍ଚିତ ।

ଅତୀତକୁ ଯିଏ ସାଇତି ରଖିଛି

ତା ଭବିଷ୍ୟତ ଉଜ୍ଜ୍ୱଳ 

ବର୍ତ୍ତମାନ ପାଇଁ ପଥ ପ୍ରଦର୍ଶକ 

ନିହତ କର୍ମର ବେଳ ।

ବର୍ତ୍ତମାନ ପାଇଁ କଷ୍ଟ ଭୋଗେ ଯିଏ

ଆଗକୁ ସାଇତେ ସୁଖ

ଏହିପରି ରୀତି ଜୀବନ ଚକ୍ରରେ

ଚାଲିଥାଏ ଅବିରତ ।