ଝୁଲୁ ହାତୀ ଝୁଲୁ

       ଥିଲା ଗଛଟିଏ ଗଛରେ ଗଛଏ

            ପାଚିଥିଲା ଜାମୁକୋଳି

       ସେ ଗଛଡାଳରେ ଭାଲୁଛୁଆମାନେ

            ଖେଳୁଥିଲେ ସିଡ଼ି ଦୋଳି ।। 

       ଝୁଲୁଥିଲା ଦୋଳି ଦୋଳିରେ ସଭିଏଁ

            ଗାଉଥିଲେ ଦୋଳି ଗୀତ

       ବସି ଦେଖୁଥିଲେ ହନୁଛୁଆମାନେ

            ଆହୁରି ଯେତକ ମିତ ।। 

       ଏତିକିବେଳକୁ ଗଛମୂଳେ ଆସି

            ପହଞ୍ଚିଲା କୁନି ହାତୀ

       ଦେଖି ଦୋଳି ଖେଳ ସାଙ୍ଗ ସାଥି ମେଳ

            ମନ ତା' ଉଠିଲା ମାତି ।। 

       ଦୋଳି ମୁଁ ଖେଳିବି ଖେଳିବି ମୁଁ ଦୋଳି

            କହିଲା ସେ ବାରବାର

       ଯେତେ କହିଲେ ବି ଭାଲୁଛୁଆମାନେ

            ଶୁଣିଲେନି କଥା ତା'ର ।। 

       ହେଇ ଚାଲିଯାଆ ଉପରକୁ ହେଇ

            ତଳକୁ ଯାଆ ତୁ ଚାଲି

       ଦୋଳି ଝୁଲୁଥିଲା ଦୋଳି ପବନରେ

            ଉଡୁଥିଲା ଧୂଳି ବାଲି ।। 

       ଭାଲୁଛୁଆଙ୍କର ସିଡ଼ି ଦୋଳି ଖେଳ

            ଦେଖୁଥିଲେ ସବୁ ଘେରି

       ନିରାଶରେ କାନ୍ଦି କାନ୍ଦି କୁନି ହାତୀ

            ଘରକୁ ଆସିଲା ଫେରି ।। 

       ଘରେ ପହଞ୍ଚିଲା ମାଆଙ୍କୁ କହିଲା

            ମାଆ ପୋଛିଦେଇ ଲୁହ

       ଝୁଲାଇଲେ ଦୋଳି ଦେଖି ତାହା ତା'ର

            ହସିଲା ଦିଶିଲା ମୁହଁ ।। 

       'ଝୁଲୁ ହାତୀ ଝୁଲୁ' ଗାଇଦେଲେ ମାଆ

            ଖେଳରେ ଗଲା ସେ ମାତି

       ଝୁଲି ଝୁଲି ଝୁଲି ଖେଳି ଖେଳି ଦୋଳି

            ତୁନି ହେଲା କୁନି ହାତୀ ।।