ନାରୀ

ନାରୀଟିଏ ଅଟେ ସୃଷ୍ଟିର ସମ୍ପଦ

    ତାହାକୁ ଦେବା ସମ୍ମାନ

କୁରୁବଂଶ ସମୂଳରେ ନାଶ ଗଲା 

    କରି ନାରୀ ଅପମାନ ।

ସ୍ନେହ ଶ୍ରଦ୍ଧା ପୂର୍ଣ୍ଣ ଭଣ୍ଡାରରେ ଥାଏ

     ଅମୃତ ର ବାରିଧାରା

ମୂର୍ତ୍ତିମନ୍ତ ପ୍ରତୀକ ସିଏ ତ୍ୟାଗର

    ସର୍ବସଂହା ବସୁନ୍ଧରା ।

ନିଜେ ଦୁଃଖ କଷ୍ଟ ସହିକରି ସିଏ

   ଅନ୍ୟକୁ ଆନନ୍ଦ ଦିଏ

ଦୀପ ଶିଖା ପରି ଜୀବନ ତାହାର

   ସବୁବେଳେ ଜଳୁଥାଏ ।

ମାତୃଶକ୍ତି ସିଏ ତା କୃପା ନ ହେଲେ

   କିଛି କାମ ହୁଏ ନାହିଁ

ଜନନୀ, ଭଗିନୀ, ଜାୟା ରୂପେ ଥାଇ

   ଦିଗ ଦର୍ଶନ ଦିଅଇ ।

ପ୍ରଭୁ ରାମଚନ୍ଦ୍ର ରାବଣ ବଧି ଲେ

   ମାତା ଜାନକୀଙ୍କ ପାଇଁ

ପାଣ୍ଡଵଙ୍କୁ ବନବାସ ବାଧିଲାନି 

    ସତୀ ଦ୍ରୌପଦୀ ଙ୍କ ପାଇଁ ।

ପ୍ରଭୁ ଜଗନ୍ନାଥ ମା ଲକ୍ଷ୍ମୀ ଙ୍କ ପାଇଁ

    ଭିକ୍ଷା ବୃତ୍ତି ଆଚରିଲେ

ନାରୀଟିଏ ନାରାୟଣୀ ଯେ ପାଲଟେ

   ସମ୍ମାନ ତା କ୍ଷୁର୍ଣ୍ଣ ହେଲେ ।

ନାରୀ ଓ ପୁରୁଷ ଗୋଟିଏ. ଟଙ୍କାର

   ଅଟନ୍ତି ଦୁଇଟି ପାର୍ଶ୍ଵ

ପରସ୍ପର ଦୁଃଖ ସୁଖ ବାଣ୍ଟିଲେ ଯେ

   ମିଳଇ ଶାନ୍ତି, ସନ୍ତୋଷ ।

ଜଗତ ବନ୍ଦିନୀ, ଦୁଷ୍ଟ ସଂହାରିଣୀ

   ମହାମାୟା ଆଦିଶକ୍ତି

ନାରୀ ବିନା ନର ଅଧୁରା ଅଟନ୍ତି

   ସୃଷ୍ଟି କର୍ତ୍ତା ରଚିଛନ୍ତି ।