Library
Profile
ଝରକା ସେ ପାଖ ରାସ୍ତାରେ
ଝରକା ସେ ପାଖ ରାସ୍ତାରେ
ଆବଦ୍ଧ କୋଠରୀର ଚାରିକାନ୍ଥ ଭିତରେ ରହି
ଝରକା ସେ ପାଖ ରାସ୍ତାରେ
ତୁମକୁ ଯିବାର ଦେଖେ ମୁଁ ବହୁବାର
କେବେ ଚାଲିଥାଅ ଭିଡ଼ ଭିତରେ
ନିଜକୁ ସଂକୁଚିତ କରି ସ୍ବାଭିମାନରେ
କେବେ ପୁଣି ଏକା ଏକା ଜନ ଶୂନ୍ୟତାରେ
ତୁମ ଇତସ୍ତତଃ ଆଖିକୁ ପହଁରାଇ ନିଅ
ଅବୁଝା ପ୍ରଶ୍ନର ଉତ୍ତର ଖୋଜିବାର ଠାଣିରେ
ମୁଁ ଅପଲକେ ଚାହିଁଥାଏଁ ତୁମକୁ
ଟାଣିନିଅ ମୋର ଏକାଗ୍ରତାର ଧ୍ୟାନକୁ
ଝରକା ସେ ପାଖ ରାସ୍ତାରେ
ଚୁମ୍ବକ ଆକର୍ଷଣ କରି ନେଲା ପରି ଲୁହାକୁ
ରୂପ ତୁମର ଝଲସେ ମାର୍ବଲ୍ କାନ୍ଥରେ
ସୁନ୍ଦର ପ୍ରତିବିମ୍ବ ଯେତେ ହୋଇ
ତାର ପ୍ରତିଫଳନ ହୁଏ ମୋ ମନର ଆଇନାରେ
ଆଧୁନିକ ସାଜସଜ୍ଜାର ଜୀବନ୍ତ କଣ୍ଡେଇ ଭଳି
କାଞ୍ଚା ହଳଦୀ ବୋଳା ଗୋରା ଦେହ
ଜାଗି ଉଠେ ମୋ ମନରେ ଅହେତୁକ ମୋହ
ଲାଲିମା ଫଟା କଅଁଳ ଓଠର ନିଶବ୍ଦ ହସ
ଲାଗୁଥାଏ ଫୁଟାଫୁଲର ପାଖୁଡ଼ା ସମ
ଲଲାଟରେ କୁମକୁମ୍ ବିନ୍ଦି ଅନୁପମ
ନୂଆ ନୂଆ ପୋଷାକରେ ଲାଗ ରଙ୍ଗର ଫଗୁଣ
ଗଢ଼ି ହୋଇଯାଏ ଭିନ୍ନ ଏକ ଦୁନିଆଁ
ଝରକା ସେ ପାଖ ରାସ୍ତାରେ
ସ୍ଥାଣୁ ନିର୍ବାକ୍ ପାଲଟି ସେ ଦୁର୍ବଳ ମୁହୂର୍ତ୍ତରେ
ଅକୁହା ନୀରବ ପ୍ରେମରେ ହୁଏଁ ମୁଁ ବଶ
ଭାବନାର ଗଛଡାଳେ ପେନ୍ଥା ପେନ୍ଥା କଢ଼ ସବୁ
ଫୁଟି ଉଠି ମହକିବାକୁ କରନ୍ତି ଉପକ୍ରମ
ତୁମେ ଚାଲିଗଲା ପରେ ବି ମୋ ଆଖି ସାମ୍ନାରୁ
ତୁମର ସେ ଚାହାଁଣୀକୁ ମୁଁ ପଢ଼ୁଥାଏଁ
ଆଙ୍କୁଥାଏଁ ମନର କାନ୍ଭାସ୍ ରେ ତୁମର ଛବି
ତୁମେ ଭଲ ପାଅ କି ପାରେନା ଭାବି
ତଥାପି ଏକତରଫା ଭଲ ପାଇ ହୁଏ ମୁଁ ଖୁସି
ନୀରବ ପ୍ରେମର ମଧ୍ୟ ଅଛି ଏକ ନିଆରା ଅନୁଭବ
ଯଦିଓ ମୁଁ ଜାଣିଛି ଭଲ ଭାବରେ
ହାତ ବଢ଼ାଇ ଧରି ହୁଏନା ପାଣିର ମାଛକୁ
ବା ଆକାଶରେ ଉଡୁଥିବା ପକ୍ଷୀକୁ
ଜାଣି ଜାଣି ବି ସବୁ ନଜର ଅଟକି ଯାଏ
ଝରକା ସେ ପାଖ ରାସ୍ତାରେ ।
