ଜହ୍ନ ହସେ ଖିଲି ଖିଲି

ସୂର୍ଯ୍ୟ ଗଲେ ବୁଡି

ବେଳ ଯାଏ ଗଡି

       ଜହ୍ନ ହସେ ଖିଲି ଖିଲି

କାମଧନ୍ଦା ସାରି

ଫେରନ୍ତି ଶ୍ରମିକ

        ନିଜ ନିଜ ବାସସ୍ଥଳୀ !

ହମା ରଢ଼ି ଛାଡି 

ଗୋଠକୁ ଫେରନ୍ତି

       ବାଛୁରୀ ସଙ୍ଗତେ ଗାଈ

 ଡେଣା ଝାଡ଼ି ଫେରେ

ମାଆ ପକ୍ଷୀଟିଏ

       ଛୁଆ ପାଖେ ଖାଦ୍ୟ ଧରି !

ଜହ୍ନିଫୁଲ ଫୁଟି

ଆକାଶକୁ ଚାହିଁ

      ହସୁଥାଏ ଖିଲି ଖିଲି

ବାସ ଚହଟାଇ

ସେ ଗଙ୍ଗଶିଉଳି

     ଭାବେ ପ୍ରତିଷ୍ୟରେ ମଲି !

ସନ୍ଧ୍ୟା ଘଣ୍ଟ ବାଜେ

 ମନ୍ଦିର ବେଢାରେ

      କି ଆନନ୍ଦ ଭକ୍ତଜନେ

 ସନ୍ଧ୍ୟା ଆଳତୀରେ

  ପ୍ରଣତି ଜଣାଏ

       ଭକ୍ତି ଭାବ ରଖିମନେ !

 ତୁଳସୀ ଚଉରା

ମୂଳେ ସନ୍ଧ୍ୟା ବତୀ

       ଦେଖି ଖୁସି ସଂଧ୍ୟାରଣୀ

ଘରେ ଘରେ ଶଙ୍ଖ 

ନାଦରେ ବ୍ରହ୍ମାଣ୍ଡ

    କି ଆନନ୍ଦେ ହୁଏଗୁଣି !

ବୁଢ଼ାବୁଢ଼ୀ ମିଳି 

ଥିରି ପାଦେଚାଲି

     ହାତେରେ ଲଣ୍ଠନ ଧରି

ଭାଗବତ ଶୁଣି

ଆନନ୍ଦେ ଫେରନ୍ତି

      ଭାବ ଅସ୍ୱାଦନା କରି!

ହସି ହସାଇବା

ଏ ସାରା ସଂସାର

     ଭୁଲି ଯିବା ନିଜ ପର

ଜହ୍ନ ମାମୁପରି

ସବୁରି ମନରେ

    ଆନନ୍ଦ ଉଲ୍ଲାସ ଭର !