ଶୁଭ ଦୀପାବଳି

ଆଲୋକର ପର୍ବ      ଶୁଭ ଦୀପାବଳି

     ଆଗମନେ ଜଳେ ଦୀପ

ପୁର ପଲ୍ଲୀ ଦିଶେ     ଶୋଭାର ଆଧାର

    ଦେବ ପୀଠେ ଜପ ତପ ।

ଶାନ୍ତି ଦୟା କ୍ଷମା      ଅହିଂସା ଗୁଣରେ

     ହୋଇ ସଦା ବିମଣ୍ଡିତ

ଆନନ୍ଦରେ ଜାଳ       ଶାନ୍ତିର ପ୍ରଦୀପ

      ଜ୍ଞାନ କରି ପ୍ରଜ୍ଜ୍ଵଳିତ ।

ଅନ୍ଧାରରେ ଦୀପ      ବୁଣଇ ଆଲୋକ

      ଧରା ଦିଶେ ଶୋଭାବନ୍ତ

ପବିତ୍ରତା ମନେ     ଭକ୍ତି ପ୍ରେମ ସ୍ରୋତେ

    ଭବୁ ଦୁଃଖ ହେଉ ଅନ୍ତ ।   

ପିତୃ ପୁରୁଷଙ୍କୁ       ଭକ୍ତି ଶ୍ରଦ୍ଧା ଭରେ

       ଦେଇ ଶ୍ରାଦ୍ଧ ଏହି ଦିନ

ପୂର୍ବ ପୁରୁଷଙ୍କ         ଆଶିଷ ଲଭନ୍ତି      

       ଉଲ୍ଲସିତ ହୁଏ ପ୍ରାଣ ।

ଆଜି ଶୁଭ ଲଗ୍ନ       ସର୍ବେ ଆନନ୍ଦିତ

     ଆସିବେ ବଡ଼ ବଡ଼ୁଆ

ଅନ୍ଧାରରେ ଆସି     ଯିବେ ଆଲୁଅରେ

    ସଭିଙ୍କୁ କରି ସୁଦୟା ।

ଶଙ୍ଖ ହୁଳହୁଳି       ଶବ୍ଦେ ପଡେ ହୂରି

      ଆସୁଛନ୍ତି ଶ୍ୟାମା କାଳୀ

ପୂଜା ମଣ୍ଡପରେ      ବିରାଜିତ ହେବେ

      ସବୁ ପାପ ଦେବେ ଜାଳି ।

ହୃଦୟରେ ଜ୍ଞାନ        କରି ପ୍ରଜ୍ଜ୍ଵଳିତ

       ଦୂର କର ହିଂସା ଭାବ 

ଅନ୍ୟାୟ ଅନୀତି      ଅହଙ୍କାର ନିଶ୍ଚେ

     ବିଶ୍ବରୁ ଦୂରେଇ ଯିବ ।

ପିଠା ପଣା ଖାଇ      ଆତସ ବାଜିରେ

     ହର୍ଷୋଳାସେ ଯିବା ଖେଳି

ପରକୁ ଆପଣା       ଭାବ ହୃଦେ ବହି

    ସର୍ବେ ହେବା କୋଳାକୋଳି ।