Library
ହଲିଆ ଗୀତ
ହଲିଆ ଗୀତ
ଆରେ ହେ
ସମଲପୁରର ମାଗୋ ଇଷ୍ଟ ଦେବୀ ତୁଇ
ସେମେଲ ତଲେ ପୂଜା ପାଉ ମାତ ସମଲେଇ
ସଂସାର ପାଲିନି ମାଗୋ ଇଷ୍ଟଦେବୀ
ରଖିଥିବୁ ଛତର ଉଢେଇ ଗୋ ହ ।
ଆରେ ହେ
ତୋର ଦୟାରୁ ମାଧୋ ସିଂହର ପରାକ୍ରମ ଯେତେ
ମାଟିର ଲାଗି ଝଲସୁ ଥିଲା ସୁରେନ୍ଦର ସତେ
ଗଙ୍ଗାଧର ଭୀମଭୋଇ ରଖିଲେ କିରତି ଗୋ ମା
ଏ ସାରା ଜଗତେ ଗୋ ହ ।
ଆରେ ହେ
ହରିଶଙ୍କର ନରସିଂହ ନାଥର କିରତି ମହାନ
ଗନ୍ଧମାର୍ଦ୍ଦନ ଧରି ଅଛେ ଉସୋ କସାର ମାନ
ହୀରାକୁଦର ବିଜିଲି ତ ଚମକେ
ହେଇ ତେଜିୟାନ ରେ ହ ।
ଆରେ ହେ
ପାତାଳି ଶ୍ରୀକ୍ଷେତ୍ର ଦେଖ ତ୍ରିକୁଟ ପର୍ବତ
ଦେବ ଝରନ ଝରୁଅଛେ ସେନ ଅବିରତ
ବାଘପାଲି ଦେଉଲଝରି ଫୁର୍ଲିଝରନ
ଆରୁ ପପଙ୍ଗା ପର୍ବତ ରେ ହ ।
ଆରେ ହେ
ବକ୍ର ମନ୍ଦିର ହୁମା ଆରୁ ଚଉସଠି ଯୋଗିନୀ
ସୋନପୁରର ଅଷ୍ଟ ଚଣ୍ଡି ଆରୁ ମେଟାକାନୀ
କଳାହାଣ୍ଡିର ଘୁମରା ସୁରେ ନାଚୁଛେ
ମା ମାଣିକେଶ୍ୱରୀ ହୋ ହ ।
ଆରେ ହେ
ସମ୍ବଲପୁରୀ ଗାନା ଆଉ ପିନ୍ଧନ ଉଢନ
ଡାଲଖାଇ ମାଏଲା ଜଡ ସେ ଢୁଲ ନିଶାନ
ରଙ୍ଗବତୀ ରଙ୍ଗେଇ ଦେଲା ପୁରଥୀ କେ
ହେଇ ତେଜିୟାନ ରେ ହ ।
ଆରେ ହେ
ଆଏଜ ଜନମ ଦିନ ଗୁରୁ ସତ୍ୟ ବହିଦାରର
ଜନମ ଦିନେ ପାହା ତଲେ ମୋର କୋଟି ଜୁହାର
ଆସ ସଭେ ଗୁନ ଗାଏମା ଭାଇ ହୋ
ହେଇ ଏକାକାର ହୋ ହ ।
