ଝରା ଶେଫାଳିର ମହକ

କଢି ଧରିଲା ପ୍ରସ୍ଫୁଟିତ ହେଲା

ଭୂରୁ ଭୂରୁ ବାସ୍ନାରେ ବାସ୍ନାୟିତ ହେଲା

ଅବର୍ଣ୍ଣନୀୟ ଲାଳିମାର ଆଭା

ତା ଭିତରୁ ବିଛୁରିତ ହେଲା ।

କୋମଳମତି ସେ ନବଯୌବନା

ପାହାଡ଼ି କନ୍ୟା ସେ ଛୁଟାଇ ବନ୍ୟା

ଡଙ୍ଗରି ଝରଣାର ସଙ୍ଗୀତ ମୂର୍ଚ୍ଛନା ।

ଅଫୁଟା ଫୁଟିଲା ବାସ ଚହଟିଲା

ପ୍ରତିଭା ବିକଶି 

ଯୌବନ ସୀମାର ଶିଖର ଛୁଇଁଲା 

ସୁନ୍ଦରତା ପଣେ ସଭିଙ୍କୁ ମୋହିଲା !!

ଜଗତର ତାରାଟିଏ

ଅନୁଭବର ଦୃଷ୍ଟାନ୍ତ ସିଏ 

ପଥରର ଅନୁକମ୍ପନ

ପ୍ରତିଭାର ଉଦ୍ଗିରଣ

ଯୌବନର କାମିନୀ କାଞ୍ଚନ !

ଆଧୁନିକତାର

ସମତାଳରେ ସେ 

ସାମିଲ ହେବ ବା କେମିତି ?

ପାଶ୍ଚାତ୍ୟ ସଭ୍ୟତାର ସ୍ୱାଦ 

ଚାଖିପାରିନି ସିନା 

ସଂସ୍କୃତି ଓ ସଭ୍ୟତାର 

ସୁଦୀର୍ଘ ପାଚେରୀ ଭିତରେ

ନିଜକୁ ସେ ଆବଦ୍ଧ ରଖିଛି 

ସୂର୍ଯ୍ୟାସ୍ତକୁ ପାଟ କରି

ଦେହରେ ପିନ୍ଧିଛି 

କେଶରେ ଯତନ କରି

ତାରାଙ୍କୁ ଖୋସିଛି !!

ପ୍ରତିଭାର ତାଜମହଲରେ

ନିନାଦିତ ପ୍ରତିଟି ପାଖୁଡ଼ାରୁ

କେମିତି ଛୁଟୁଛି ତା ଜୀବନଗ୍ରନ୍ଥର

ଅପୂର୍ବ ଝଟକ ।

ଅସଭ୍ୟତାର ସେ ଅନ୍ଧପୁଟୁଳି ଭିତରୁ 

ବାହାରି ଆସ ଦେଖିବ 

ତା କରୁଣ କାହାଣୀର ଝଲକ ।

ଅନୁଭବ କର ଥରେ

ଜାଣିପାରିବ

ସେ ଝରା ଶେଫାଳିର ମହକ ।।।