ହିମାଳୟ
ହିମାଳୟ
ପ୍ରକୃତି ରାଣୀର ରୂପ ମନୋହର
ଭୂମିରୂପ ଭିନ୍ନ ଭିନ୍ନ,
ପର୍ବତ ଅଞ୍ଚଳ, ମାଳ, ମରୁଭୂମି,
ସମତଳ ଭୂମି ମାନ |
ହିମାଳୟ ଗିରି ସବୁଠାରୁ ବଡ଼
ଏସିଆ ମହାଦେଶରେ,
ଭାରତ, ତିବ୍ବତ ଦେଶେ ଅବସ୍ଥିତ
ମୁଣ୍ଡ ଟେକି ସଗର୍ବରେ |
ସଦା ହିମାବୃତ ହୋଇଥଏ ସିଏ
ତେଣୁ ନାମ ହିମାଳୟ,
ଧବଳ ରୂପରେ ଉପରି ଭାଗ ତା
ଦିଶେ ଅତି ଶୋଭନୀୟ |
ବହୁ ପର୍ବତର ସମାହାର ସିଏ
ସତେ ଏକ ପରିବାର,
ଲଗାଲଗି ହୋଇ ରହିଛନ୍ତି ସବୁ
ହୋଇ ସଦା ଆପଣାର |
ଏଭେରେଷ୍ଟ ଶୃଙ୍ଗ ସବୁଠାରୁ ଉଚ୍ଚ
ସତେ କି ମସ୍ତକ ତାର,
ଅମ୍ଳଜାନ ସ୍ତର ନଥାଇ ତାହା ବି
ସ୍ପର୍ଶ ପାଏ ମଣିଷର |
ଗଙ୍ଗା, ବ୍ରହ୍ମପୁତ୍ର,ସିନ୍ଧୁ ନଦୀ ଜନ୍ମ
ହିମାଳୟୁ ହୋଇଛନ୍ତି,
ଶ୍ୟାମ ସୁଷମାରେ ଭରି ଶସ୍ୟ କ୍ଷେତ୍ର
ଜନମନ ମୋହୁଛନ୍ତି |
ନିମ୍ନଭାଗେ ତାର ଅରଣ୍ୟ ଶୋଭିତ
ବାସ ବି କରନ୍ତି ଲୋକେ,
କିଛି ବନ୍ୟ ଜନ୍ତୁ ଜଳବାୟୁ ମତେ
ରହିଛନ୍ତି ତାର ବକ୍ଷେ |
ପୁରାଣେ ବର୍ଣ୍ଣିତ ବହୁ ଗାଥା ତାର
ପବିତ୍ର ଯେ ହିମାଳୟ,
କୈଳାସ ପର୍ବତ ରହିଛି ସେଠାରେ
ଶିବ ପାର୍ବତୀ ଆଳୟ |
ପାଣ୍ଡବଙ୍କ ଜ୍ୟେଷ୍ଠ ଭ୍ରାତ ଯୁଧିଷ୍ଠିର
ହିମାଳୟ ପଥଦେଇ,
ଯାଇଥିଲେ ସ୍ୱର୍ଗ ଚଢି ଏ ପର୍ବତ
ରାମାୟଣ ଅଛି କହି |
ପବିତ୍ର ଗଙ୍ଗାଙ୍କୁ ସରଗ ପୁରରୁ
ଆଣିଥିଲେ ଭଗିରଥ,
ହିମାଳୟେ ସିଏ ରହି ଭାରତକୁ
ବହି କରୁଛି ପବିତ୍ର |
ବହୁ ମୁନୀ ଋଷି ହିମାଳୟ କୋଳେ
ତପସ୍ୟାରେ ମଗ୍ନ ହୋଇ,
ପାଇଛନ୍ତି ମୋକ୍ଷ ପୁରାଣେ ରଚିତ
କାହାଣୀ ଯାଉଛି ଗାଇ |
ବହୁ ଔଷଧୀୟ ଗୁଳ୍ମ ତା ବକ୍ଷରେ
ଜନମେ ଅମୃତ ସମ,
ଇତିହାସ ତାର ନାହିଁ ପଟାନ୍ତର
ସତେ ଅବା ସ୍ୱର୍ଗଧାମ |