ହେ ରାମ

ଶୁଣିଛୁ ପଢୁଛୁ ଜୀବନୀ ବୃତ୍ତାନ୍ତ

ଚରିତ ମହାପୁରୁଷ

ଜନମ ଲଭିଣ ଏଇ ଧରାପୃଷ୍ଠେ

ରଖି ଯାଇଛନ୍ତି ଯଶ ।

ଅବତରି ଥିଲେ ରାମ କୃଷ୍ଣ ବୁଦ୍ଧ

ସତ୍ୟ ତ୍ରେତୟା ଦ୍ୱାପରେ

ସତ୍ୟ ଗୁଣାଦର୍ଶ କରିଲେ ସ୍ଥାପନ

ସଂହାରି ଦୈତ୍ୟ ଅସୁରେ ।

କ୍ରୁଶବିଦ୍ଧ ହୋଇ ପ୍ରଭୁ ଯୀଶୁଖ୍ରୀଷ୍ଟ

ଆଚରିଲେ ଗୁଣ କ୍ଷମା

ଇଚ୍ଛିଲେ ସୁବୁଦ୍ଧି ସଦ୍ଭାବନା ପ୍ରେମ

ପରମେଶ୍ୱର ପ୍ରାର୍ଥନା ।

ସାବରମତୀର ସନ୍ଥ ମହାତ୍ମା

ଗାନ୍ଧିଜୀ ଅହିଂସା ମନ୍ତ୍ରେ

କିଣି ପାରିଥିଲେ କୋଟି ଜନମନ

ଆମରି ଦେଶ ଭାରତେ ।

ପ୍ରବଳ ପ୍ରତାପୀ ଇଂରେଜ ଶାସନ

ହୋଇଥିଲା ଥରହର

ହାସଲ କରିଲା ପୂର୍ଣ୍ଣ ସ୍ୱାଧିନତା

ଭାରତ ଦେଶ ଆମର ।

ହୁଏ ଯୁଗେ ଯୁଗେ ଅନ୍ୟାୟ ବିରୁଦ୍ଧେ 

ସତ୍ୟର ମହସଂଗ୍ରାମ

ଅସତ୍ୟ ପାପର ହୁଅଇ ବିନାଶ

ଜିଣିଥାଏ ସତ୍ୟ ପୁଣ୍ୟ ।

ଅତି ସନ୍ତର୍ପଣେ ଆସନ୍ତି ନିଶବ୍ଦେ

ମୃତ୍ୟୁଦୂତ ଆତତାୟୀ

ନିକ୍ଷେପନ୍ତି ଶର ଚଢାନ୍ତି ଫାଶରେ

ବନ୍ଦୁକେ ଫୁଟାନ୍ତି ଗୁଳି ।

ଟଳଇ ଶରୀର ରହିଯାଏ ଯଶ

ରାମ କୃଷ୍ଣ ଭଗବାନ

ମହାତ୍ମାଙ୍କ ମୁଖେ ଲାଖିରହେ ହାସ୍ୟ

ଉଚ୍ଚାରଣ ହେ-ରାମ ।

ଜଗତ ଉଦ୍ଧାର ନିମନ୍ତେ ମହାତ୍ମା

କରନ୍ତି ସର୍ବସ୍ୱ ଦାନ

ହେ ଜ୍ୟୋତି ସ୍ୱରୂପ ପୂର୍ବସୂରୀଗଣ

ମହାତ୍ମା କୋଟି ପ୍ରଣାମ ।

    -------