ମହାପ୍ରଭୁ ଙ୍କ ଲକ୍ଷ୍ମୀନୃସିଂହ ବେଶ
ମହାପ୍ରଭୁ ଙ୍କ ଲକ୍ଷ୍ମୀନୃସିଂହ ବେଶ
ଚାରିଦିନେ ଆସି ପହଞ୍ଚେ ପଞ୍ଚୁକ
ପଞ୍ଚମେ ହୋଇବ ଶେଷ l
ଶ୍ରୀ ଲକ୍ଷ୍ମୀନୃସିଂହ ବେଶ ମଣ୍ଡି ହେଲେ
ମହାପ୍ରଭୁ ଜଗଦୀଶ ll
ଶିରେ ଦିଶେ ଶୋଭା ଡାଳିକିଆ ପ୍ରଭା
ସୁନାଦୂବ କେରି କେରି l
ସୁବର୍ଣ୍ଣର ଚିତା ସ୍କନ୍ଧ ରେ ପଇତା
ଜଗତ ମଙ୍ଗଳ ହରି ll
ବୈକୁଣ୍ଠ ବିହାରୀ ପ୍ରଭୁ ଦଇତାରୀ
ସଙ୍ଗେ ଧରି ସିନ୍ଧୁ ଜେମା l
ନମଃ ନାରାୟଣ କମଳା ରମଣ
ଦୋଷ କର ମୋର କ୍ଷମା ll
ସତ୍ୟଯୁଗେ ଗୋଳ ହୋଇଲା ପ୍ରବଳ
ହିରଣ୍ୟାକ୍ଷ ନେଲା ହରି l
ରସାତଳେ ମାରି ମହୀ ଉଦ୍ଧାରିଲ
ଶୂକର ଦନ୍ତାଗ୍ରେ ଧରି ll
ହିରଣ୍ୟାକ୍ଷ ଭ୍ରାତ ହିରଣ୍ୟ କଶିପୁ
ପୁତ୍ର ତାର ପ୍ରହଲ୍ଲାଦ l
ହରି ଭଜନରେ ମଜ୍ଜନ ରହିଲା
ପିତାରେ ହେଲା ବିବାଦ ll
ନାନା କଷ୍ଟ ଦେଇ ହିରଣ୍ୟକଶିପୁ
ପୁତ୍ର ନ ପାରିଲା ମାରି l
ଅବୁଝା ପଣରେ ପ୍ରଲ୍ଲାଦ ବୋଇଲା
ସ୍ତମ୍ଭରେ ଅଛନ୍ତି ହରି ll
ଘୋର ରୋଷ ହୋଇ ହିରଣ୍ୟକଶିପୁ
ଗଦା ପ୍ରହାରିଲା ସ୍ତମ୍ଭେ l
ବିକଟାଳ ରୂପ ପ୍ରଭୁ ବାହାରିଲେ
ନରସିଂହ ରୂପେ ଦମ୍ଭେ ll
ବିକଟ ଗର୍ଜନେ ହିରଣ୍ୟ କଶିପୁ
ତର୍ଜନୀରେ ନେଲେ ଧରି l
ବୁକୁ ବିଦାରିଲେ ଗଳାରେ ପିନ୍ଧିଲେ
ଅନ୍ତଃ ନାଡ଼ ମାଳା କରି ll
ସେହି ପ୍ରଭୁ ମୋର ନୀଳାଚଳେ ବିଜେ
ଯୁଗେ ଯୁଗେ ଅବତାର l
ଦୁଷ୍ଟ ସଂହାରଣ ଧର୍ମ ସଂସ୍ଥାପନ
କୋଟି କୋଟି ନମସ୍କାର ll
ଶ୍ରୀଲକ୍ଷ୍ମୀନୃସିଂହ ବେଶ ଦରଶନେ
ପୁରିଗଲା ମନରଙ୍କା l
ନମଃ ନାରାୟଣ ନୃସିଂହ ଚରଣ
ଶ୍ରୀକ୍ଷେତ୍ର କୈବଲ୍ୟ ବିକା ll
ପୁଣ୍ୟ କାର୍ତ୍ତିକ ର ଚତୁର୍ଥେ ପଞ୍ଚୁକ
ବୈକୁଣ୍ଠ ଚତୁର୍ଦ୍ଦଶୀ l
ବୈକୁଣ୍ଠ ବିହାରୀ ପ୍ରଭୁ ନରହରି
ନମଃ ନମଃ ବ୍ରହ୍ମରାଶି ll