ମହାପ୍ରଭୁ ଙ୍କ ରାଜରାଜେଶ୍ୱର ବେଶ
ମହାପ୍ରଭୁ ଙ୍କ ରାଜରାଜେଶ୍ୱର ବେଶ
ମହା ପଞ୍ଚୁକ ର ପଞ୍ଚମ ଦିବସେ
କାର୍ତ୍ତିକ ରାସ ପୂର୍ଣ୍ଣିମା l
ରାଜରାଜେଶ୍ୱର ବେଶ ହେଲେ
ପ୍ରଭୁ ନୀଳଶଇଳ ଚନ୍ଦ୍ରମା ll
ନାନା ଅଳଙ୍କାରେ ବିଭୂଷିତ ପ୍ରଭୁ
ମହା ଐଶ୍ୱର୍ଯ୍ୟ ପ୍ରକାଶ l
ଭକ୍ତଗଣେ ପ୍ରଭୁ କଣେଇ ଚାହାଁନ୍ତି
ବଙ୍କିମ ଅଧରେ ହସ ll
ସ୍ବର୍ଣ୍ଣମୟ ବେଶେ ଜଗତ ମୋହୁଛ
ତୁମ୍ଭେ ରାଜ ରାଜେଶ୍ୱର l
ଜଗତ ଠାକୁର ଚକା ଆଖି ତବ
ସତେ କେଡ଼େ ମନୋହର ll
ଭକତକୁ ପରା ନେବ କୋଳକରି
ପ୍ରସାରି ବସିଛ ହାତ l
ଆହେ ଲୀଳାମୟ କରୁଣା ଆଳୟ
ତୁମ୍ଭେ ତ ବିଶ୍ୱ ସମ୍ରାଟ ll
ସୁବର୍ଣ୍ଣ ମୁକୁଟ ସୁବର୍ଣ୍ଣ କୀରୀଟ
ସୁବର୍ଣ୍ଣ ରେ ହସ୍ତ ପଦ l
କରପତ୍ର ଯୋଡ଼ି ଭକତେ ଜଣାନ୍ତି
ଖଣ୍ଡ ପ୍ରଭୁ ପରମାଦ ll
ଶିରରେ ସୁବର୍ଣ୍ଣ ଦୂବ କେରା କେରା
ଦିଶୁଥାଇ କେଡ଼େ ତୋରା l
ଶ୍ୱେତ ପଦ୍ମ ଆଖି, ଆଖି ଯାଏ ଲାଖି
ଆହେ ପ୍ରଭୁ ଶ୍ୟାମ ଗୋରା ll
ଭାଇ ବଳଦେବ, ଭଉଣୀ ସୁଭଦ୍ରା
ବନ ହଳଦିଆ ମୁଖି l
ଚତୁର୍ଦ୍ଧା ମୂରତୀ, ଚକ୍ର ସୁଦର୍ଶନ
ନୀଳାଚଳେ ବସି ସୁଖୀ ll
ହୃଦରେ ତୁମ୍ଭର କୗସ୍ତୁଭ ମଣି
ଦିଶୁଥାଇ ଝଟ ଝଟ l
କର୍ଣ୍ଣ ରେ କୁଣ୍ଡଳ ଗଳେ ରତ୍ନମାଳ
ଭୂଜ ରେ ସ୍ବର୍ଣ୍ଣ ବାହୁଟ ll
ଶଙ୍ଖ,ଚକ୍ର, ଗଦା, ପଦ୍ମ, ମହାବାହୁ
ଧରି ଅଛ ଆଣ୍ଟ କରି l
ଦୁଃସହ, ଦୁର୍ଗତି ମହାକାଳ ଭୟ
ପଳାଇ ଯାଆନ୍ତି ଡରି ll
ନୀଳଚକ୍ରେ ଉଡ଼ାଇଛ ବୈଜୟନ୍ତୀ
ବିଶ୍ୱ ବିଜୟ କେତନ l
ଜନ୍ମଦୁଃଖ ଖଣ୍ଡେ ଦେଖିଦେଲେ ଦଣ୍ଡେ
ନାମ ପତିତପାବନ ll
ହେ ଐଶ୍ୱର୍ୟ୍ଯମୟ ଠାକୁରେ ପ୍ରଭୁ ହେ
ତୁମ୍ଭେ ବିଶ୍ୱ କାରିଗର l
ଚରଣେ ଶରଣ ଆହେ ନାରାୟଣ
ଶରଣ ରଖ ମୋହର ll