ଶ୍ରୀକାର୍ତ୍ତିକେୟ ବନ୍ଦନା

  

 

ନମଃ ଦେବ ସେନାପତି ଗଉରୀ ନନ୍ଦନ l

ତାରକ ନିଧନ ଅର୍ଥେ ହେଲ ଉତ୍ପନ ll

କଠୋର ତପଶ୍ଚରଣେ ମାତା ଅନ୍ନପୂର୍ଣ୍ଣା l

ପର୍ଣ୍ଣ ସୁଦ୍ଧା ନ ଭକ୍ଷିଲେ,ବିଦିତ ଅପର୍ଣ୍ଣା ll

ତପବଳେ ଆଶୁତୋଷ ଗିରୀଶ ମଜାଇ l

ତୁମ୍ଭଙ୍କୁ ଲଭିଲେ ସ୍କନ୍ଧମାତା ମହାଦେଈ ll

ଚନ୍ଦ୍ର, ସୂର୍ଯ୍ୟ କାନ୍ତି ତଵ ଅତୀବ ସୁନ୍ଦର l

ଦେବକାର୍ଯ୍ୟ ସାଧନରେ ରହିଲ କୁମାର ll

ଦକ୍ଷିଣ ରାଇଜେ ତୁମ୍ଭ ନାମ ମୁରୁଗନ l

କୁମାର ସ୍ୱାମୀ, ମୁରୁଗ, ସୁବ୍ରମଣ୍ୟମ ll

ବାହନ ତୁମ୍ଭର ଅଟେ ସୁନ୍ଦର ମୟୂର l

ଭୁଜଙ୍ଗେ ପଳାଇଯାନ୍ତି ରଡ଼ି ଶୁଣି ଯାର ll

ଭ୍ରାତା ତୁମ୍ଭର ଅଟନ୍ତି ଗଣେଶ ବିଦ୍ୱାନ l

ଅଗ୍ରପୂଜ୍ୟ, ବିଘ୍ନରାଜ ପ୍ରଭୁ ଗଜାନନ ll

ଜନ୍ମକାଳେ ଷଡ଼ମାତା ଦେଲେ କ୍ଷୀରପାନ l

ତାରକ ଜିତେ ବହିଲ ନାମ ଷଢ଼ାନନ ll

କୃତ୍ତିକା ନକ୍ଷତ୍ର ଯୋଗେ ଜନମ ଲଭିଲ l

କାର୍ତ୍ତିକେୟ ତେଣୁକରି ନାମକୁ ବହିଲ ll

କ୍ରୋଉଞ୍ଚ ନାମରେ ତୁମ୍ଭେ ବଧି ରାକ୍ଷସ କୁ l

ବହି ଅଛ ଦେବ କ୍ରୋୖଞ୍ଚଦାରୁଣ ନାମକୁ ll

କୁମାର ସମ୍ଭବ କାବ୍ୟେ କବି କାଳିଦାସ l

ଉଦାତ୍ତ କଣ୍ଠେ ତୁମ୍ଭର ଗାଇଗଲେ ଯଶ ll

ତୁମ୍ଭ ଶ୍ରୀମୁଖ ନିଃସୃତ ଶ୍ରୀ ସ୍କନ୍ଧ ପୁରାଣ l

ଚରିତ ତୁମ୍ଭର ପ୍ରଭୁ ହୋଇଛି ବଖାଣ ll

ପୁଣ୍ୟ କାର୍ତ୍ତିକେ ତୁମ୍ଭର ହୁଏ ଦିବ୍ୟ ପୂଜା l

ନମସ୍ତେ ଗଜବଦନ, ଶଙ୍କର, ଗିରିଜା ll