Library
ହେ ବର୍ଷା
ହେ ବର୍ଷା
ହେ ବର୍ଷା !
ତୁମରି ସ୍ପର୍ଶରେ ଏସୃଷ୍ଟି ହେଉଛି
କେତେ ଯେ ଶସ୍ୟ ଶ୍ୟାମଳା,
ତୁମରି ଛୁଆଁରେ ପଲ୍ଲବିତ ସବୁ
ପିନ୍ଧାଅ ବୃକ୍ଷକୁ ମାଳା।
ହେ ବର୍ଷା !
ତୁମେ ଆସିଥାଅ ଏ ଧରାକୁ ନୂଆ
କରି ଗଢି ତୋଳିବାକୁ,
ତୁମେ ଆସ ଶୁଷ୍କ ଧରାର ଛାତିରେ
ଶୀତଳତା ଭରିବାକୁ,
ହେ ବର୍ଷା !
ତୁମେତ ରୋଗୀର ଅନ୍ତର ତଳର
ସୀମାହୀନ ସରସତା,
ତୁମେ ଭରିଦିଅ ସୁପ୍ତ ମଞ୍ଜିରେ
ଚେତନାର ନୂଆ ବାର୍ତ୍ତା।
ହେ ବର୍ଷା !
ତୁମେ ଭରିଦିଅ ମୟୁର ଶରୀରେ
ନୃତ୍ୟର କାଉଁରୀ ସ୍ପର୍ଶ,
ତୁମେ ଅଟ ପରା ଶିଶୁର ଓଠରେ
ମେଞ୍ଚାଏ ଦରୋଟି ହସ।
ହେ ବର୍ଷା !
ତୁମେ ଲେଖିଦିଅ ନଈ ହୃଦୟରେ
କୁଳୁକୁଳୁ ନୂଆ ଗୀତି,
ତୁମକୁ ଅପେକ୍ଷା କରିଛି ଝରଣା
ଝରାଇବ ବୋଲି ପ୍ରୀତି।
ହେ ବର୍ଷା!
ଇନ୍ଦ୍ରଧନୁର ସପ୍ତରଙ୍ଗେ ତୁମେ
ବାଦଲର ରୂପରେଖ,
ନୀଳ ଦରିଆର ପ୍ରତିଛବି ତୁମେ
ଆକାଶରୁ ଥାଇ ଦେଖ।
ହେ ବର୍ଷା !
ଜଗତ ମଙ୍ଗଳ ତୁମ ଇଚ୍ଛା ପରା
ଜଗତ କଲ୍ୟାଣମୟୀ,
ପ୍ରଦୂଷିତ ଏଇ ପରିବେଶ ଯେଣୁ
ତୁମେ ଯାଉଛ ଉଭେଇ।
ହେ ବର୍ଷା !
କେବେ ସୃଷ୍ଟିକର ମହାବାତ୍ୟା ପୁଣି
କେବେ ଜଳର ପ୍ରଳୟ,
ନର ସାଜିଅଛି ସୃଷ୍ଟିର ଘାତକ
ଗାଇକି ଯନ୍ତ୍ରର ଜୟ।
ହେ ବର୍ଷା !
ତୁମେତ ଦେଉଛ ଚେତାଇ ସଭିଙ୍କୁ
'ମା 'ପରି କର ଆକଟ,
ତଥାପି ଏ ନର କାହିଁକି ଧାଇଁଛି
କରୁଛି କୂଟ କପଟ।
ହେ ବର୍ଷା !
ତୁମେ ମଣିଷ ମନରେ ଭରିଦିଅ ସେନେହର ମିଠା ଗନ୍ଧ ,
ହରିନିଅ ତାର ସବୁ ଅବଗୁଣ
ନର ହୋଇଯାଉ ଶୁଦ୍ଧ।
