ହାରିଥିବା ପ୍ରେମ
ହାରିଥିବା ପ୍ରେମ
କିଛି ଫୁଲ ଝରେ ପୂଜାରେ ନ ଲାଗି,
କିଛି ଦୀପ ଲିଭେ ଝଡ ଵତସେ,
କେବେ କୁମୁଦିନୀ ଝଡେ ପ୍ରଭାତରେ,
ବିତାଇ ରଜନୀ ଘୋର ଉଆଁସେ I
ମିଳନର ଇଚ୍ଛା ମଳିନ ପଡ଼ଇ,
ମିଛ ହୋଇ ଯାଏ ସତ୍ୟ ବନ୍ଧନ,
ହୃଦୟର ଶତ୍ରୁ ସାଜେ ପୁଣି କେବେ,
ହୃଦ ଭିତରର ମୃଦୁ ସ୍ପନ୍ଦନ ।
ହାରି ହରେଇବା ଦୁଃଖକୁ ବୁଝିଛି,
ବିଚ୍ଛେଦ ଛବି ଆଖିରେ ଆଙ୍କିଛି,
"ଯିଏ ଅଟେ ପର ହୁଏନା ନିଜର"
ଏହି ସତ୍ୟଟି ମୋ ସ୍ଵପ୍ନ ଭାଙ୍ଗିଛି I
ଢେଉ ପରେ ଢ଼େଉ ଗଣିକି ବସିଛି ,
ଏକାକୀ ହଜି ବିଜନ ବେଳାରେ,
ପରିତ୍ୟକ୍ତ ଆଜି ହୃଦୟଟି ମୋର,
ପାଏନି ସାହାରା ସାଙ୍ଗ ମେଳାରେ ।
ଭାଙ୍ଗି ବାଲି ଘର ନିଷ୍ଠୁର ସାଗର,
ଧୋଇ ନିଏ ଯେ ଆଶାର ଶାମୁକା ,
ହଜେଇବ ଦିନେ ଲୁହର ତଟିନୀ,
ସୀମାହୀନ ଏ ବିରହ ବାଲୁକା,
ସାଜିବିନି ମୁଁ ବାସର ରାତିରେ,
ମଧୁଶଯ୍ୟାରେ ତୁମର ନାୟିକା,
ପାଇବିନି ତୁମ ପ୍ରୀତି ଆଲିଙ୍ଗନ
ହୋଇବିନି ତୁମ ଅଭିସାରିକା I