ଗୁରୁ
ଗୁରୁ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଅଜ୍ଞାନ ଅନ୍ଧାର କରିଥାନ୍ତି ଦୂର
ଜ୍ଞାନର ଆଲୋକ ଜାଳି
ଅବାଟରୁ ସିଏ ବାଟକୁ ଆଣନ୍ତି
ଦେଇ ପୁଣି ମିଠା ଗାଳି ।
ଛାଇ ପରି ସଦା ପାଖେପାଖେ ରହି
ଦେଖାଇ ଦିଅନ୍ତି ବାଟ
ବାପାମାଆ ପରି ଆକଟ କରନ୍ତି
ହୃଦେ ଧରି ଜ୍ଞାନ ଛାଟ ।
ବିଦ୍ୟାଳୟ ରମ୍ୟ ଉପବନେ ସିଏ
ଦାୟିତ୍ବସଂପନ୍ନ ମାଳୀ
ଛାତ୍ରଛାତ୍ରୀ ତାଙ୍କ ସେବା ଯତନରେ
ଫୁଟିଥାନ୍ତି ଭଳିଭଳି ।
ତାଙ୍କରି କୋମଳ ପରଶରେ ସିନା
ଶିକ୍ଷାର କୁସୁମ ଫୁଟେ
ଭୂମିରୁ ଭୂମାକୁ ଦିଗ ଚହଟାଇ
ସୁବାସ ତାହାର ଛୁଟେ ।
ସଳିତାଟେ ଭଳି ନିଜେ ଜଳିଜଳି
ଫୁଟାନ୍ତି ମଣିଷ ଫୁଲ
ହସିହସି ସଦା କର୍ତ୍ତବ୍ୟ କରନ୍ତି
କିଏ ହେବ ତାଙ୍କ ତୁଲ ।
ତାଙ୍କରି ଚରଣେ ଢାଳିଦିଏ ଦେଶ
ଭକତିର ଫୁଲ ହାର
ଗୁରୁଦେବ ବ୍ରହ୍ମା, ଗୁରୁଦେବ ବିଷ୍ଣ
ଗୁରୁଦେବ ମହେଶ୍ବର ।