ଶିଶୁମାନେ ନବକଳି

ଶିକ୍ଷକ ସମାଜ କୁମ୍ଭାର ପରିକା

ଶିଶୁମାନେ କଞ୍ଚା ମାଟି

ଯେମିତି ଚାହିଁବା ସେମିତି ଗଢିବା

ଯିବନି ବି ଟିକେ ଫାଟି ।

ପାଠ ପଢା ସହ ଚରିତ୍ର ଗଠନ

ଶିଖାଇବା ଶିଶୁଗଣେ

ମାନବିକତାର ଚାରା ରୋପି,ସିଞ୍ଚି

ସ୍ନେହ ବାରି ପ୍ରତି କ୍ଷଣେ ।

ବୁକୁର ମମତା ମୁଖର ମଧୁରେ

ମୋହିବା ସଭିଙ୍କ ମନ

ଜ୍ଞାନର ଭଣ୍ଡାର ଖୋଲିଦେବା ସବୁ

ସିଏ ତ ବାସ୍ତବ ଧନ ।

ଲହୁଣୀଠୁ ବଳି କୋମଳ ହୃଦୟ

ଶିଶୁମାନେ ନବ କଳି

ମନ ପ୍ରାଣ ଦେଇ ଯତନ କରିବା

ପାଦରେ ଦେବାନି ଦଳି ।

ପ୍ରତିଟି ପାଖୁଡା ସୁରଭି ରେଣୁରେ

ଭରିଦେବା ଆମେ ପରା

ସେ କୋମଳ କଳି ବିକଶିତ ହେଇ

ମହକେଇ ଦେବ ଧରା ।