ନାଆଁଟି ତା'ର ବହି
ନାଆଁଟି ତା'ର ବହି
ଅତି ଆପଣା ସାଥୀଟେ ଆମ
ନାଆଁଟି ତା'ର ବହି
ଗୀତ,କାହାଣୀ ବିଜ୍ଞାନ ବାଣୀ
ଦେଉଥାଏ ସେ କହି ।
ଦେଶ ଦୁନିଆ ଖବର ଯେତେ
ସବୁ ରଖିଛି ଧରି
ଦୁର୍ଗମ ପଥେ ଦେଖାଏ ବାଟ
ଜ୍ଞାନ ଆଲୋକ ଭରି ।
ନିଃସଙ୍ଗତାକୁ ଦୂରେଇ ଦିଏ
ପାଖରେ ଥିଲେ ଆହା
ସୁଖଦୁଃଖରେ ବନ୍ଧୁଟେ ପରି
ହୁଅଇ ସଦା ସାହା ।
ଆଳସ୍ୟ ତେଜି ମନ ଲଗାଇ
ପଢିବା ଯଦି ବହି
ଜାଣିବା କେତେ ଅଜଣା କଥା
ସେଥିରେ ଅଛି ରହି ।
ଛପା ବହିର ଆଦର ସିନା
ଯାଉଛି ଟିକେ ଖସି
ନୂଆ ରୂପରେ ଡିଜିଟାଲରେ
ପଢୁଛୁ ନିତି ବସି ।
ବହିର ଯେତେ ଗରିମା ଅଛି
ପାଇବା ସତେ କାହିଁ
ତାହାରି ପରି ବିଶ୍ବାସୀ ବନ୍ଧୁ
ଜଗତେ ଆଉ ନାହିଁ ।