ଗର୍ବ କରିବୁ ଚୂନା

କାହିଁକି ଆସିଲୁ କରୋନା ଦୁଃଖ ଦେଲୁ ବହୁତ,

ଜାଣିନାହୁଁ ଆମ ଏ'ଦେଶ ପୁଣ୍ୟଭୂମି ଭାରତ |

ନାନାଜାତି ଧର୍ମ ବର୍ଣ୍ଣର ଲୋକେ ଏଠି ଅଛନ୍ତି,

ବାରମାସେ ତେର ପରବ ପୂଜା-ପାଠ କରନ୍ତି |

ଶ୍ରୀମନ୍ଦିରେ ପ୍ରଭୁ ଭକ୍ତଙ୍କୁ ରହି ଅଛନ୍ତି ଚାହିଁ ,

ରାମ ନବମୀରେ ମନ୍ଦିର ଖୋଲା ହୋଇଲା ନାହିଁ |

ରଥଯାତ୍ରା ହୁଏ ବର୍ଷରେ ଯାହା ବିଶ୍ୱ ବିଖ୍ୟାତ,

ତୋର ଆତଙ୍କରେ ବିକଳେ ଦୂରୁ ଡାକେ ଭକତ

ହନୁମାନଙ୍କର ଜୟନ୍ତୀ ନବବର୍ଷ ପାଳନ,

ଆନନ୍ଦ ଦିନକୁ ସତରେ କଲୁ ଦୁଃଖର ଦିନ |

କେତେ ପୁଣ୍ୟତିଥି ଜନମଦିନ ବେକାର ଗଲା,

କେତେ ବାହାଘର ଅଟକି ଖାଲି ଯାତନା ଦେଲା |

ବିଷୁବ ସଂକ୍ରାନ୍ତି ଦିନରେ ପଣା ଦେଲୁନି ପେଇ,

ଉତ୍କଳ ଦିବସ ଉତ୍ସବ ସୁଖ ଦେଲୁ ଲିଭେଇ |

ସାହିତ୍ୟ ସଂସ୍କୃତି ଉତ୍ସବ ନାଚ ଯାତରା ମେଳା, 

ତୋର ଆତଙ୍କରେ ସବୁଠି ସବୁ ବନ୍ଦହେଲା |

ପାର୍କ ପଡ଼ିଆ ପଡ଼ିଛି ପିଲା ରହିଲେ ଘରେ,

ଭକ୍ତ ଠାରୁ ଭଗବାନଙ୍କୁ ତୁହି ରଖିଲୁ ଦୂରେ |

ଧର୍ମ ପୀଠ ହେଲା ନିର୍ଜନ ଅସହାୟ ଜୀବନ,

ପର୍ଯ୍ୟଟନ କ୍ଷେତ୍ର ବୁଲିବା ହେଇଗଲା ବାରଣ |

କେତେ ନିରୀହଙ୍କୁ ମାରିଲୁ ଯମ ଯନ୍ତ୍ରଣା ଦେଇ,

ଏମିତି ଭୂତାଣୁ ତୋହର ମାଡ଼େ ଦେଲେ କେ ଛୁଇଁ |

ଅସଲ ଅସୁର ତୁହି ତ ଦେଖା ଦେଉନା ସିନା,

ଆମେ ମିଶି ଲଢ଼ି ତୋହର ଗର୍ବ କରିବୁ ଚୂନା |