ଗଣିତର ଚାରିସୂତ୍ରେ ଗଢ଼ା ଏ ଜୀବନ

ଗଣିତର ଚାରିସୂତ୍ରେ ଗଢ଼ା ଏ ଜୀବନ

ଜନନୀ ଜଠରୁ ତାହା ଆରମ୍ଭ ହୋଇଣ ।

ମଶାଣି ଭୁଇଁରେ ପଡ଼ି ପାଉଁଶ ହୋଇଲେ

ଜୀବନ ଅଛିଣ୍ଡା ଅଙ୍କ ତୁଟଇ କି ଭଲେ ।

ଜୀବନର ପ୍ରତି କ୍ଷଣେ ହୁଏ ଅନୁଭବ

ଗାଣିତିକ ସୂତ୍ରେ ଗଢ଼ା ଅଟଇ ଏ ଭବ ।

ମିଶାଣରେ ହସ ଖୁସିରସର ମୂର୍ଚ୍ଛନା

ବୀଣା ଜିଣା ଝଙ୍କାରରେ କରାଏ ଉନ୍ମନା ।

ଆବେଗ ଆହ୍ୱାନ ଧାରା ଜାରି ରଖି ନିତି

ଅଭିନବ ପ୍ରୟାସରେ ଯାଏ ଦିନ ବିତି ।

ଯେତେ ଯାହା ସବୁ ଭଲମନ୍ଦ ପାପପୂଣ୍ୟ

ଗୁଣ , କୀର୍ତ୍ତି , ଯଶ, ଖ୍ୟାତି , ଧରମ , ସମ୍ପନ୍ନ ।

ହୋଇ କ୍ରମେ କ୍ରମେ ଧୀରେ ଅଗ୍ରଗତି ନେଇ

 ସମୀକ୍ଷା କରଇ ଅନୁମାନକୁ ଲଗାଇ ।

ମିଶାଣ ଫେଡ଼ାଣ କରେ ପାପ ଓ ପୂଣ୍ୟର

କରେ ଆକଳନ ନିଜ କାର୍ଯ୍ୟ ଓ ଭାଗ୍ୟର ।

କର୍ମା କର୍ମ ଧର୍ମା ଧର୍ମ ସଂସ୍କୃତି ଚେତନା

ପ୍ରବୃତ୍ତି , ନିବୃତ୍ତି , ବୈରାଗ୍ୟ , ଓ ବିବେଚନା ।

ବୁଦ୍ଧି , ବୃତ୍ତି , ବିଚାର ଓ ଚିନ୍ତା ଅନୁଯାୟୀ

ଗଣିତର ଚାରିସୂତ୍ରେ ଗଢ଼ା ଏ ହୁଅଇ ।

ସ୍ନେହ , ଶ୍ରଦ୍ଧା , ପ୍ରେମ , ପ୍ରୀତି ଆଦି ଭାବଧାରା

ଚମତ୍କାର ଭାବେ ଯହିଁ ରଚି ଚାଲେ ଲୀଳା ।

କରେ ତାହା ଅନୁରୂପ ଫଳ ସିଦ୍ଧିଲାଭ

ଜୀବନ ପବିତ୍ର କରେ ଦିବ୍ୟ ଅନୁଭବ ।

ଆନନ୍ଦ , ବିଷାଦ , ଶୋକ , ଆଦି ଯେତେସବୁ

ଜୀବ ଜୀବନେ ଲଭଇ , ଚାରିସୂତ୍ର ହେତୁ ।