ଏଲିଏନ୍
ଏଲିଏନ୍
ଏଲିଏନ୍ ଏକ ବୁଲି ଆସିଥିଲା
ଆମ ପୃଥିବୀକୁ ଥରେ ।
ଏମିତିକା ଜୀବ ଦେଖି ତ ନଥିଲେ
କେହି ବି ନିଜ ଆଖିରେ ।
କେଡେ ଭୟଙ୍କର ରୂପ ଥିଲା ତାର
ଯେ ଦେଖିଲା ସେ ଡରିଲା।
ଅଜବ ଜୀବଟା କେଉଁ ରାଇଜରୁ
ଏଠିକି କିଆଁ ଆସିଲା ।
ଏ କାନୁ ସେ କାନ କଥା ଗଲା ଚାଲି
ତାଟି କବାଟ ପଡିଲା ।
ସତେକି ଏ ଜୀବ ମଣିଷ ଖାଇବ
ଭାଳେଣି ଖାଲି ପଡିଲା।
ଯିଏ ବି ଦେଖିଲା ଲୁଚି ପଳାଇଲା
ଆଗକୁ କେହି ନଗଲେ ।
କବାଟ ଝରକା ଫାଙ୍କ ଦେଇ ତାକୁ
କେହି କେହି ଦେଖୁଥିଲେ।
ମୁଣ୍ଡରେ ତାହାର କିଛି ଚୁଟି ନାହିଁ
ଦିଶୁଥିଲା ଚିକଣିଆ ।
ଆଖିର ଭ୍ରୂଲତା ନଥିଲା ତାହାର
ଆଖି ଥିଲା କୋରଡିଆ ।
କେତେଟା ଆଖି ବି ରହିଥିଲା ତାର
ଭଲ ଭାବେ ନ ଦିଶିଲା ।
କିଏ କହେ ତାର ଦୁଇ ଆଖି ଥିଲା
ପାଞ୍ଚ ସାତ କେ କହିଲା ।
ମାଡି ଆସୁଥିଲା ଗରଜନ କରି
ମଣିଷ ଖାଇବ ବୋଲି ।
ପାଦକୁ ତାହାର ଦେଖିନି ତ କେହି
କେତେ ପାଦ ଥିଲା ବୋଲି ।
ଅଜବ ରାଇଜୁ ଗଜବ ଜୀବଟା
ଆସିଛି ବୋଲି କେ କହେ ।
କେହି ନଜାଣିଲେ ଏ ଅଜବ ଜୀବ
ସତ ଏଲିଏନଟିଏ ।
ବୁଲି ବୁଲି ଏଲିଏନ୍ ଗଲା ଚାଲି
ଆମ ଏଇ ପୃଥିବୀରୁ ।
ପରେ ବାହାରିଲେ ଯେତେ ଯିଏ ଥିଲେ
ସଭିଏଁ ଘର ଭିତରୁ ।