ଏକତାର ମନ୍ତ୍ର ଘୋଷ

ସୁପ୍ତ ଜନତା ଜାଗ୍ରତ ହୁଅ

ଏକତାର ମନ୍ତ୍ର ଘୋଷ,

ସେଇ ମନ୍ତ୍ର ନାଦେ ନିନାଦିତ ହେଉ

ଏ ସାରା ଭାରତବର୍ଷ ।(୦)

ସନ୍ଥ ସମାନ ସ୍ୱଚ୍ଛକର ମନ,

ଗୁଣ-ଗରିମାରେ ହୁଅ ଗରୀୟାନ ।

ତା' ହୃତ ଗୌରବ ଆକର୍ଷି ଆଣ

ଆଜି ଲୋଡ଼ୁଛି ଯା' ଦେଶ ।(୧)

ସୁପ୍ତ ଜନତା ଜାଗ୍ରତ ହୁଅ

ଏକତାର ମନ୍ତ୍ର ଘୋଷ...

କାପୁରୁଷ ନୁହଁ, ତୁମେ ସିଂହଛୁଆ,

ବଜ୍ର ସମାନ ଟାଣ କର ହିଆ ।

ପ୍ରତିରୋଧ କର ଅନ୍ୟାୟ ଯାହା

ପ୍ରସର ସତ୍ୟର ଯଶ ।(୨)

ସୁପ୍ତ ଜନତା ଜାଗ୍ରତ ହୁଅ

ଏକତାର ମନ୍ତ୍ର ଘୋଷ...

ଶୂର-ବୀରଙ୍କର ଉତ୍ତର ଦାୟାଦ,

ଚେତିଉଠ ତୁମେ ଭାଙ୍ଗି ତୁମ ନିଦ ।

କର ଦେଶହିତ ନାଶି ଭେଦାଭେଦ

ପୂର୍ଣ୍ଣ ପ୍ରାଣେ ବହି ହର୍ଷ ।(୩)

ସୁପ୍ତ ଜନତା ଜାଗ୍ରତ ହୁଅ

ଏକତାର ମନ୍ତ୍ର ଘୋଷ...

ସେଇ ମନ୍ତ୍ର ନାଦେ ନିନାଦିତ ହେଉ

ଏ ସାରା ଭାରତବର୍ଷ ।